طاجن اللحمة والرز على "سفرة دايمة"

على "سفرة دايمة" النهارده هنقدّم لكم أكلة شهية جدا ومناسبة لجوّ الشتاء البارد، وهي طاجن اللحمة بلسان العصفور والرز، جرّبوها وابعتوا لنا رأيكم فيها.

طاجن اللحمة بلسان العصفور
المقادير:
1/ 4 كيلو لسان عصفور محمص
1/ 2 كيلو رز
1/ 2 كيلو لحمة تُقطّع مكعبات صغيرة
3 حبات بصل
2 حبة طماطم
حبة فلفل أحمر
حبة فلفل حامي
4 ملعقة كبيرة زبدة

الطريقة:
1- تبّلي اللحمة بالملح والفلفل، وشوّحيها في ملعقتين زبدة لمدة 5 دقائق لحد ما تاخد لون، وبعدين تضيفي عليها بصل مفروم خشن، وغطّيها وسيبيها على النار.
2- بعد ما البصل يدبل حطّي مكعبات الفلفل الأحمر والطماطم والفلفل الحامي وقلبيهم، وغطّي الحلة مرة كمان، وسيبيها لحد ما اللحمة تستوي نصف تسوية، وتشرب السائل اللي فيها.
3- حطّي باقي كمية الزبدة، وشوّحي فيها الرز واللسان عصفور، وقلّبيهم مع بعض وتبليهم بالملح، وبعدين اسقيهم بكمية من شوربة فراخ أو لحمة تغطيهم، وبعدين غطي الحلة، وسيبيها على النار لحد ما الرز ولسان العصفور يستوي نصف تسوية.
4- بعد ما اللحمة تستوي وخليط الرز ولسان العصفور يستوي ابدئي جهزي الطاجن؛ وده بإنك تدهنيه بمادة دهنية، وبعدين حطي فيه الرز، واعملي فتحة في منتصف الطاجن، وصبّي فيها خليط اللحمة، واسقيه بنصف كوب من الشوربة ودخّليه الفرن.
5- بعد ما كل المكونات في الطاجن تستوي طلّعيه من الفرن، وقدّميه.. بالهنا والشفا.

خلصت وصفتنا النهارده..
استنونا كل يوم مع وصفات جديدة..
سلام،،،