س و ج عن الانتخابات.. هتلاقي عندنا الإجابات

طبعا دلوقت عندك مليون سؤال وسؤال وأنت فاضل بينك وبين صندوق الانتخابات ساعات؛ لو كنت من مصوتي الدائرة الأولى.
أما لو كنت محظوظ ومن مصوتي المرحلتين الثانية والثالثة فهنيئا لك؛ لسه عندك وقت تذاكر كويس وتعرف هتعمل أيه!!
أيوه تذاكر ما هو صوتك ده أمانة بجد مش مجرد تعبير، الصوت اللي أنت هتحطه في صندوق الانتخابات ربما هيفرق ويحدد من هياخد مقعد في البرلمان، ومين له أغلبية أكثر، ومين هيكتب الدستور اللي هو الأساس لكل القادم في البلد.
علشان كده لازم تحترس وتذاكر كويس المرشحين علشان تعرف مين كويس ومين وحش، وإحنا في "بص وطل" هنساعدك تقوم بده وهنعرض عليك في صورة سؤال وجواب أهم الأسئلة اللي بنعتقد إنها بتدور في عقلك دلوقتي؛ لأنها دارت في عقولنا قبل كده، ودورنا لحد ما لقينا ليها إجابات وحبينا نشاركك معانا فيها.
س1- أنا مؤيد لاعتصام التحرير، وشايف إن التصويت في الانتخابات خيانة لموقفي المعارض؟
ج1- وليه ما تستخدمش كل الأوراق المتاحة عندك؟ انت مقتنع باستخدام سلاح التظاهر والاعتصام للضغط، لكن في نفس الوقت ده ما يمنعنش إنك تستخدم سلاح الانتخابات علشان تغير بشكل ديموقراطي كمان من خلال صندوق الانتخابات، ما هو لو أنت قاطعت الانتخابات أو حتى أبطلت صوتك اللي هيكسب من يطلق عليهم الفلول أو أشخاص لا يستحقون مقاعدهم في البرلمان، وساعتها بقى هيتبجحوا ويبقوا بيتكلموا كمان باسم القانون والشعب اللي اختارهم، علشان كده ماتديش حد فرصة يضيع صوتك، فاعمل ما تراه مناسبا من تحركات على الأرض؛ ولكن ماتهملش صندوق الانتخابات.
س2- أنا مش فاهم يعني أيه اختار قايمة حزب كاملة، وأنا معرفش كل اللي مرشحين فيه طيب ربما يكون واحد فيهم أنا عايزه والتاني لأ.. أعمل أيه؟
ج2- يبقى أنت كده لسه ماوصلكش طبيعة وغرض النظام الانتخابي الجديد وخاصة الجزء الخاص بالقائمة فيه، غرض النائب الأساسي في مصر ما بعد الثورة مش أنه يشوف وظيفة لابن صديقه فلان في المنطقة، أو يدور على شقة في المحافظة للي بيجمع له أصوات كثير في الدايرة، أو يدبح كل عيد ويفرق لحمة على أهالي الدايرة، ولا حتى ينظم لهم مصايف رخيصة علشان يبسطهم..
لأ أحذر وظيفة النايب مش مندوب خدمات، تدي له صوتك مقابل يشغل ابنك، وظيفة النائب الأساسية التشريع؛ إنه يصوت لك أو يعبر عن صوتك في الدستور والقوانين اللي بيتم التصويت عليها في المجلس.
وأنه يراقب لك الحكومة، هو يعتبر عينك عند الدولة اللي بتراقب كل تصرف وتحاسب أي فرد في الحكومة ماينفذش اللي أنت عايزة.
يعني ببساطة اختيارك للنائب لا يتعلق بكم الخدمات اللي هيقدر يديهالك؛ وعلشان كده أنت مع نظام القائمة بتختار أفكار الحزب أو التحالف اللي تابعه ليه القائمة مش أفراد، فمثلا أفكار الحزب (أ) بتعبر عنك، أما الحزب (ب) فأفكاره منفتحة كتير، والحزب (ج) أفكاره متزمتة أوي، بالشكل ده يبقى أنت هتختار قايمة الحزب (أ)؛ لأنه هو اللي بيعبر عنك، ومش هتهتم كتير بمين اللي جوا القايمة.
لكن..
أحذر في الوقت ده خاصة من الفلول اللي تسللوا لبعض الأحزاب، وعلشان كده لازم تتأكد إن الحزب اللي أنت هتختار قايمته مش بيحط على قوائمه أي فلول.
س3- طيب يا ترى أقدر أعرف أفكار كل حزب أو تحالف منين؟
ج3- الإنترنت هو مفتاح الانتخابات دي؛ لأن كل المعلومات متواجدة عليه، كل حزب أو تحالف ليه موقع على النت، ده غير صفحة على فيس بوك، وفي صفحاته والمواقع دي هتلاقي الحزب عارض وجهة نظره في المواضيع والقضايا المختلفة، وبكده تقدر تعرف توجه وآراء الحزب أو التحالف، وتعرف إذا كان يتلائم معاك وهتديه صوتك ولا لأ.
س4- طيب القايمة كده بقى أمرها سهل أعمل أيه في الفردي؛ ده حتى موقع الانتخابات ذاكر أسماء بس دون أي تفاصيل؟
ج4- دي مشكلة طبعا؛ نظرا لكبر حكم الدواير.. زمان كانت الدايرة صغيرة وأنت عارف كل مرشحينك؛ لكن دلوقت الموضوع كبر، وعلشان كده هننصحك بعدد من النصايح..
أولا: دور على مرشحي الأحزاب والتحالفات اللي أنت مقتنع بيها، واللي منزله نواب للفردي كمان مش قوائم بس، وده تقدر تعرفه عن طريق مواقع الحزب بل وعن طريق الاتصال بالحزب والسؤال ونمرة كل حزب أو تحالف هتلاقيها في موقعه، وبكده تبقى اخترت شخص ليه توجه أنت مقتنع بيه.
ثانيا: بعض المواقع والمجلات والجرائد بتقدم لك خدمات وملاحق طول فترة ما قبل الانتخابات بتعرفك على المرشحين دول وانتمائهم أيه، أعمل أنت سيرش عليها هتلاقيها وهتعرفك كتير عن مرشحك.
ثالثا: نزل قائمة المرشحين الفردي في دايرتك من موقع الانتخابات www.elections2011.eg واتسلى، وخدهم اسم اسم وأعمل بحث عنهم على جوجول، هتلاقي معلومات كتير تعرفك مين هو المرشح ده، وهل كان منتمي للحزب الوطني المنحل قبل كده ولا لأ، هل هو ليبرالي أم يساري أم إسلامي، ربما تجد ليه تصريحات وآراء قالها في قضايا محدده، بل هتتفاجئ أن أغلب المرشحين عاملين لنفسهم صفحات على فيس بوك؛ تقدر تعرف معلومات أكتر عنهم، وقرر بعد كده مين الأصلح..
س5- أعمل أيه لو جيت أدخل دايرتي ولقيت بلطجة فيها لا قدر الله، أو لقيت القاضي مش موجود، أو حد بيمنعني أدي صوتي للي أنا اختارته؟

ج5- هنقولك على طول اتصل بأرقام تليفونات غرفة العمليات المركزية لمراقبة الانتخابات البرلمانية ولتلقى الشكاوى دي: 01020339340 - 01020339341- 01020339342 - 01020339343 - 01020339344 - 01020339345 - 01020339346 - 01020339347- 01020339348 - 01020339349-01020339365 - 01020339366 - 01020339367 - 01020339368 - 01020339369 - 01020339371 - 01020339372 - 01020339373 - 01020339374 - 01020339375
بالإضافة إلى الأرقام التالية: 37624382 – 37624398 – 37624831
وأرقام الفاكس: 37624782 – 3762422
وبلغهم بالتجاوز اللي قابلتك، ولا تيأس وأرجع اللجنة في وقت تاني وحط صوتك.
في النهاية بنقول لك.. فكر وأعمل مجهود وأعرف أنت هتنتخب مين وليه، مش مهم الانتماء الفكري للي هتختاره ما دام متفق مع أفكارك وأنت مقتنع بيه.

المهم ما يكونش فلول، أو شخص كاره بلدنا تتقدم وتنتقل لمرحلة ديمقراطية حقيقية.

هي دي أمانتك وواجبك اللي لازم تأديه.