أصول الاختيار...بين شروط القبول وأوجه المفاضلة

نخلي البساط أحمدي ونتكلم بالبلدي علشان الكلام يوصل للقلب، إحنا كشعب متعلمناش الاختيار في حياتنا قبل كده، لأن مكنش فيه بدائل، ولا في حرية اتخاذ القرار، ولا تعليم مبني عالاستنتاج والتحليل علشان تقدر تبني رأي، يبقى من الآخر قبل ما نقول للناس تنتخبو مين لازم نعلمهم ينتخبو ازاي.
الانتخاب يعني الاختيار، انت هتختار ازاي؟ الكلام اللي هقوله هنا يمشي على انتخابات مجلس الشعب ورئيس الجمهورية، ويمشي كمان على أي اختيار في حياتك، لما تيجي تختار أي حد لازم تعرف إن فيه شروط أساسية هنسميها شروط قبول، وفي شروط ثانوية هنسميها أوجه مفاضلة، يعني ايه مفاضلة؟ يعني ليه تفضل حاجة عن حاجة أو شخص عن شخص، نقول امثلة بسيطة من حياتنا، لما ناس بيقدمو في شغلانة في بنك ولازم يختارو واحد منهم اولا لازم يكون خريج تجارة، لو واحد فيهم مش خريج تجارة يبقى مش هيدخل في المقارنة أصلا، بعد كده هيبصو على خبرته وممكن يعملوله اختبار قبول، شهادة بكالوريوس التجارة شرط أساسي يعني شرط قبول، والخبرة والاختبار شروط ثانوية أو أوجه مفاضلة.
نقول مثال تاني، لما بتدخل مطعم في أي بلد غريب عنك علشان تاكل، بيجيبولك قايمة الاكل وتبتدي تختار منها، يعني تنتخب، انت بتسأل عن الأكل إذا كان حلال علشان ده شرط أساسي يعني شرط قبول، ولو مثلا عندك حساسية من الأكلات البحرية برده بتتأكد إنها مش حاجات بحرية، وبرده هيبقى شرط قبول، إنما اللحمة ضاني ولا كندوز، مشوي ولا محمر، وأي مواصفات تانية دي شروط مفاضلة.
نيجي لاختيار مرشح الرئاسة، لازم يكون مصري ومش فاسد ومؤمن بالديمقراطية وبيعرف يدير الأمور، دي شروط قبول أساسية، أي مواصفات تانية هتبقى شروط مفاضلة، يعني انه يكون مدني مش عسكري ده شرط مفاضلة، إنه يكون عايش في البلد طول عمره ده شرط مفاضلة، إنه يكون لبق في الحديث ده شرط مفاضلة، يعني مينفعش اقارن بين اتنين واختار واحد علشان مدني ضد واحد عسكري والمدني فاسد مثلا، لازم الاتنين يبقو مستكملين شروط القبول بنفس الدرجة علشان ابتدي أفاضل بينهم واختار المدني على العسكري، لازم الاتنين يستكملو شروط القبول بنفس الدرجة علشان اختار اللي بيتكلم كويس على اللي مبيعرفش يتكلم، بس بشرط ان الاتنين يكونو مصريين والاتنين مش فاسدين والاتنين مؤمنين بالديمقراطية والاتنين بيعرفو يديرو الأمور، وحط تحت الشروط دي 100 خط وتحت إنه يعرف يدير الأمور مليون خط.
أنا كده قلتلك ازاي تفرق في المواصفات بين الشروط الأساسية اللي هي شروط القبول والشروط الثانوية اللي هي شروط المفاضلة، ولو قلتلي إن الشروط اللي انا حاططها تنطبق عالبرادعي فده مش ذنبي إنه فعلا أحسن واحد، ولو عندك شروط قبول غير كده هاتها، بس يا ريت متبقاش شروط تفصيل عالمرشح بتاعك، علشان احنا خلصنا من المادة 76 من الدستور وكل سنة وانت طيب