عمرو حسين يكتب: الخطوات العملية للإنتخابات البرلمانية

كتب عمرو حسين
الدايرة بتاعتنا ربنا فتح عليها من واسع و كبرت و ضمت معاها دايرة و نص كمان و الموضوع بقى هيصة كبيرة. كله بيسأل أنتخب مين؟ المشكلة مش بس نظام الإنتخاب، لأ المشكلة إن كل دايرة فيها ييجى 150 ل 200 مرشح، وكل واحد من دول وبالذات المستقلين عامل برنامج لوحده كأنه حيمشى البرلمان والبلد على مزاجه لوحده وعنده ما شاء الله حلول جذرية لكل مشاكل البلد من الزبالة للبطالة. نتصرف إزاى فى كل المرشحين دول؟ ده أنا علشان أقرا أساميهم بس محتاج ييجى أسبوع... متخافش الموضوع بسيط والحل عندى، أنت بس إمشى على الخطوات الجاية وحتلاقى الموضوع بسيط وسهل ومش محتاج تفكير كمان...شوف يا سيدى...
طيب لو متعرفش مرشح كويس، تتصرف إزاى؟ ممكن أقوللك إسأل أو إقرا أو أو أو. بس أنا عندى حل تانى للموضوع ده بسيط قوى: روح إنتخب وحاول قدر المستطاع ومتخافش خالص، غالبًا اللى أنت حتنتخبه حيسقط كده كده!
الخطوة الأولى: إعرف لجنتك فى الفردى والقوائم جيدًا طبقًا لمحل الإقامة بالرقم القومى. وإعرف كمان مواعيد الإنتخابات فى محافظتك ومواعيد الإعادة. وإن كنت من المصريين بالخارج فراجع موقع اللجنة القضائية العليا للإنتحابات فورًا لتغيير المقر الإنتخابى الخاص بك. الموقع هو: http://www.elections2011.eg
الخطوة الثانية: أشطب وإستبعد فورًا من القايمة أسامى الفلول الكبار اللى كلنا حافظين أساميهم عن ظهر قلب. لو مش عارفهم هما دول "غالبًا" كانوا النواب فى البرلمان اللى فات المزور إياه وغالبًا أساميهم فى يفط منتشرة فى كل أنحاء الدايرة وخصوصًا الميادين الكبيرة. برضه مش واخد بالك؟ فيه موقع جميل إسمه "إمسك فلول" دور على فلول دايرتك http://www.emsekflol.com. لو لسه بعد ده كله مش متأكد إستعين بصديق. ملحوظة هامة جدًا: بما إن دايرة حضرتك دخلت فى الدايرة اللى جنبها فما تنساس تسأل على فلول الجيران وتشيل أساميهم. الحمد لله على نعمة الفلول. فأنا طول عمرى بأقيس نزاهة الإنتخابات فى دايرتى على الأقل بنسبة نجاح الناس دى. وفى ظل عهد المخلوع كان عندنا برلمان نزيه بنسبة تتراوح بين 5% لحوالى 7% فوجود الفلول مهم للتأكد من نوايا الداخلية والمجلس إياه. كده أنت خلصت من حوالى 5 أو 6 أسامى من أصل 250، طب والباقى أتصرف فيه إزاى؟
الخطوة الثالثة: مطلوب من كل واحد فينا ينتخب شخص "فئات" وشخص تانى "عمال" من بين مئات المرشحين. نتصرف إزاى؟ مبدئيًا لو تعرف إنت شخصيًا شخص "كفء" وأنت واثق من إتجاهاته وآراؤه ومتأكد أنه مواطن مصرى لا يبحث عن أى مصلحة شخصية، خلاص أنت كده فى السليم، ويستحسن تغشش زمايلك وجيرانك اللى بيدوروا على نائب محترم. طيب لو متعرفش مرشح كويس، تتصرف إزاى؟ ممكن أقوللك إسأل أو إقرا أو أو أو. بس أنا عندى حل تانى للموضوع ده بسيط قوى: روح إنتخب وحاول قدر المستطاع ومتخافش خالص، غالبًا اللى أنت حتنتخبه حيسقط كده كده! أصل فى ظل وجود 200 مرشح فى كل دايرة حتتفتت الأصوات بين ال200 فمتوقع جدًا إن حيكون فيه إعادات فى كل الدواير تقريبًا. الإعادة سهلة وظريفة لأنها حتكون بين شخصين بس. ساعتها إعرف كل حاجة عن الإتنين وإختار، بسيطة أهى مفيش أسهل من كده.
الخطوة الرابعة: إختار القايمة اللى تتماشى مع ميولك السياسية. مع العلم إن فى مصر دلوقتى حوالى 27 حزب، ومش كل الاحزاب عندها قوايم فى كل اللجان. المطلوب إنك تعرف إيه هى القوايم المتاحة فى دايرتك وتختار منها اللى يتناسب مع فكرك بغض النظر عن الأشخاص داخل القائمة. والإتجاهات الغالبة للأحزاب لن تخرج عن إسلامية (سلفية أو معتدلة) أو ليبرالية أو قومية (كحزب الكرامة والأحزاب الناصرية وغيرها) أو يسارية أو فلول (والعياذ بالله).
فاضل بس إننا نأكد إن يوم الإنتخابات حيكون يوم زحمة ودى حاجة المفروض نستحملها ونفخر بيها. اللى يقدر ياخد اليوم أجازة ياخده. عايزينها بجد مليونية فى كل لجنة. نفسى فى نسب تصويت تصل لأكثر من 40 مليون مصرى. وأخيرًا وعلشان أنا لسة مش مصدق إن إحنا ممكن يبقى عندنا برلمان منتخب نزيه بنسبة أكتر من 20% (و ده الرقم القياسى المصرى التاريخى اللى تحقق عام 2005 فقط) فأنا بأدعو كل جمعيات حقوق الإنسان وكل الصحفيين والإعلاميين والناشطين وكل واحد عنده كاميرا أو حتى موبيل بكاميرا إنه يوثق أى تجاوز يحصل قدامه. والنت موجود واليوتيوب موجود وكمان ميدان التحرير موجود.
لما إن شاء الله نعدى الإنتخابات دى وجولات الإعادة بنجاح إن شاء الله رجلينا تكون خدت على اللجنة كده وعرفنا سكتها علشان لسة إنتخابات مجلس الشورى والإعادة وإنتخابات الرئاسة والإعادة برضه ده غير ما قد يستجد من إستفتاءات على الدستور الجديد وخلافه. يعنى من الآخر إعرف لجنتك وعلم عليها من دلوقتي.