لأظافر قوية وناعمة.. تابعينا مع رانيا

أعده للنشر: دينا محمد ورحاب سليمان

أهلا بكل بنات "قمر 14" في حلقة جديدة من حلقات "جمالك من الطبيعة مع رانيا"..
حلقتنا النهارده هنخصصها لأظافر الإيدين ونعومتها، وإزاي نحافظ على الأظافر إنها ماتتكسّرش، ويبقى عندنا أظافر قوية، وشكلها شيك ومهندم؛ لأن الأظافر من الحاجات اللي بتلفت النظر جدا بشكل عام، وبتدل على الرقي والشياكة.
والنهارده هنتكلّم عن أظافر الإيدين، وفي حلقة قادمة إن شاء الله هنتكلّم عن أظافر القدمين.

ودي بعض الخطوات للعناية بالأظافر:
- أول حاجة لازم نعرفها إن العناية بالأظافر تبدأ بالنظافة؛ يعني مهم جدا أدخّل الصابون بين الأظافر علشان تبقى دايما نظيفة مهما كان طولها، وفيه كمان فرش مخصصة للأظافر، وبتساعد في تنظيفها من الداخل.
- لازم نقصّ الأظافر كلها طول واحد، ومانخليش فيه ظفر أطول من ظفر بشكل لافت، ولو اتكسّر ظفر واحد لازم نحاول نخلّي باقي الأظافر بنفس الطول، أو يكون الطول قريب منه، علشان يبقى فيها تناسب.
- لو لقينا المانيكير بدأ يتمسح منه أجزاء لازم نمسحه كله تماما؛ لأن كده المنظر بيكون مش لطيف، والأظافر لما تكون بدون أي مانيكير أفضل من إنه يبقى عليها مانيكير وممسوح.
- برد الأظافر وتقليمها، ولازم يكون البرد في اتجاه واحد، يعني مايبقاش البرد في اتجاه رايح جاي؛ لأن ده بيكسر مادة الكرياتين اللي موجودة في الأظافر، ولو عايزة أعمل الأظافر على شكل "كاريه" بابرد الظافر من الأجناب في اتجاه واحد وباحدب من الأمام، والشكل ده موضة من فترة كبيرة وهو شكله شيك، وبيدّي شكل ناعم وراقي للإيدين، ولو عايزة أعمل الأظافر شكل بيضاوي يبقى هابرد من الجانبين في اتجاه واحد وبادوّر من الأمام.
طبعا المبرد الخشب بيكون أفضل من المبرد المعدن، ويفضّل إننا نستخدم المبرد مرة واحدة فقط وبعد كده نرميه، ممكن ناس تستخدمه أكتر من مرة، بس أنا مش بافضل ده، وماينفعش نستعمل مبرد مش بتاعنا؛ لأنه من الحاجات اللي لازم تكون شخصية، وطبعا المبرد اللي هاستخدمه في برد أظافر اليدين ماينفعش نستخدمه في برد أظافر القدمين؛ لأن -لا قدّر الله- ممكن يكون فيه مشكلة في أظافر القدم وتتنقل للإيد.
- الأفضل إن الأظافر تتبرد كل 15 يوم، وبعد ما نبردهم نجيب ليمونة ونقسمها، وندلّك بها الأظافر، ونعمل لها مساج سريع، والليمون من أفضل الحاجات اللي بتخلّي الأظافر قوية جدا، وكمان بتخلّي لونها نظيف وفاتح.
- يفضّل عند مسح المانيكير من الأظافر نستخدم مزيل يكون فيه زيوت أو جليسيرين، وبلاش نستخدم الأستون؛ لأنه من الحاجات اللي بجد بتكسّر مكونات الأظافر وتضعفها، وبتخلّي الظافر نفسه جاف جدا، وبعد ما أمسح المانيكير بمزيل مناسب أغسل إيدي كويس وأدعكها بالليمون تاني، وبعد كده أعمل ماسك بسيط وسهل أوي.
ماسك زيت الزيتون للأظافر
هنجيب كمية من زيت زيتون، وأحطه على النار علشان يدفى شوية، وبعد كده أحط أظافري فيه من 3 إلى 4 دقائق.
كمان زيت الخروع مفيد وممكن أعمله بنفس الطريقة، وبعد كده أدهن إيدي بزيت زيتون أو خروع، وأسيبهم على الإيد، ودي تعتبر زيوت مرطّبة ومغذية جدا.

إضغط لمشاهدة الفيديو:
فيه بنات بتكون أظافرها قصيرة ومابتطولش، وبتلجأ للأظافر الصناعية، وأنا مش بافضّل الفكرة دي؛ لأنها بتلزق بمادة الأمير ودي مضرّة جدا للأظافر، والأفضل لو عايزين نحط أظافر صناعية نستعملها في المناسبات فقط؛ لأنها ممكن تعمل فطريات، وعلاجها بياخد وقت، وكمان ممكن تعمل فراغ تحت الأظافر، وممكن بدل ما نلجأ للحل ده نعمل ماسكات لتقوية الأظافر، وهنتكلّم عنها بالتفصيل، وكمان فيه حاجات ممكن ناكلها بتساعد على تطويل الأظافر.
ودي شوية نصايح للمرأة العاملة علشان تحافظ على إيديها وأظافرها، وهي بتعمل شغل البيت:
- أول حاجة تلبسي جوانتي، وفيه أنواع كويسة ممكن تستخدميها بتكون متبطنة من جوه؛ علشان يسهل أعمال المنزل، ولو مش عارفة تشتغل بجوانتي في الإيدين ممكن تلبس في اليمين بس؛ لأنها الأكثر في الاستخدام.
- تاني حاجة بعد ما تخلّصي اغسلي إيديكي كويس أوي بالميه والصابون، وبعدين ادعكيها بنصف ليمونة، والطريقة دي تعمليها يوميا مرتين في اليوم، وبعدها حطّي كريم مرطب أو أي زيوت مرطبة؛ زي زيت اللوز أو الخروع أو زيت الزيتون، وبالنسبة للناس اللي عمرها فوق 35 أو 40 ممكن تستخدم زيت جنين القمح أو الأفوكادو؛ لأنها بتحتوي على نسبة كولاجين عالية واللي الجسم بيفقدها مع تقدّم السن.
- دايما بنلاحظ إن الإيد هي من أول الحاجات اللي بيبان عليها العجز؛ وده لأنها مافيهاش غدد دهنية خالص؛ علشان كده إحنا محتاجين دايما نرطّب إيدينا، ودايما يكون فيه كريم أو زيت مرطب قريب مننا، وبعد ما نغسل إيدينا وندعكها بالليمون نحط منه على الإيد علشان يرطبها، وكمان هيساعد على تقوية الأظافر، وممكن كمان نعمل ماسكات سنفرة على إيدينا تكون بتحتوي على لانولين أو عسل نحل أو زيت زيتون.
- من الحاجات المفيدة جدا للأظافر وللشعر والبشرة؛ هي مادة الزنك والحديد، ودي ممكن نتناولها؛ سواء في الأكل أو عن طريق أقراص بتحتوي على زنك وحديد، ومن الحاجات اللي ممكن ناكلها وبتحتوي على نسبة حديد وزنك عالية؛ هي: السبانخ، والحمص، والقمح، وده ممكن نعمله بليلة، كمان البحريات زي السمك والجمبري والكاليماري، وكل دي حاجات غنية جدا بالزنك، كمان زيت دوار الشمس من الحاجات المفيدة جدا، وطبعا البيض واللبن والجبنة.

إضغط لمشاهدة الفيديو:
خلصت حلقتنا النهارده..
استنونا الحلقة الجاية مع ماسكات للإيد والأظافر..
سلام،،،
*********************
للرجوع للحلقات السابقة
اضغط هنا "جمالك من الطبيعة مع رانيا"
*********************