فخدة ضاني في الفرن على "سفرة دايمة"

النهارده وفي أول أيام عيد الأضحى المبارك، هنقدم لكم طريقة جامدة جدا وسهلة لتقديم الفخدة الضاني، وكمان أسهل طريقة لعمل كيك الزبادي، جربوها وابعتوا لنا رأيكم فيها.

فخدة ضاني في الفرن
المقادير:
فخدة ضاني
فصوص ثوم
حبات قرنفل
فلفل أسود صحيح
لعمل التتبيلة:
كوب مية بصل
كوب ونصف عصير طماطم
ملعقة صغيرة (زعتر - روز ماري - كركم - بهارات)
1/ 4 كوب زيت
2 ملعقة خل
ملح وفلفل
لعمل الحشو:
(2 بصلة + 2 جزر + حزمة كرفس + ملح وفلفل + زعتر وروز ماري + حبهان)
1/ 2 كوب شوربة
الطريقة:
1-أول حاجة افتحي الفخدة من النصف وخرّميها بالسكينة من جوه وبره، واغرزي في الأخرام دي فصوص الثوم والفلفل الصحيح والقرنفل.
2-بعد كده اعملي التتبيلة؛ اخلطي مية الطماطم ومية البصل والزيت والملح والفلفل والزعتر والروز ماري والكركم والبهارات والخل.
3- بعد كده صبي التتبيلة دي في الفخدة من بره وجوه، ووزعيها في الفخدة كويس أوي، وحطيها في التلاجة ليلة كاملة؛ علشان تتبل كويس.
4-بعد كده قطعي البصل والجزر مكعبات كبيرة، واخلطيهم مع بعض وتبليهم بالملح والفلفل والحبهان والزعتر والروز ماري، وبعدين احشي الفخدة بالخليط ده.
5-لفي الفخدة بخيط سميك كويس أوي واربطيها، وشوّحيها على جريل أو في صينية فيها شوية زيت، ولفّيها من كل الأجناب لمدة دقيقة على كل جانب.
6- وبعدين قطّعي مجموعة خضراوات تانية (بصل، وجزر، وكرفس، وبطاطس، وورق لورا، وحبهان، وقرفة)، وحطيهم في صينية، وحطي عليهم الفخدة، واسقيها بالشوربة، ودخّليها الفرن على درجة حرارة 200 لمدة نصف ساعة.
7-بعد كده طلّعيها وغطيها بورق فويل، ودخّليها الفرن مرة كمان لمدة ساعة ونصف، على درجة حرارة 180، وعلشان تتأكدي إنها استوت ممكن تدخّلي فيها سكينة، ولو خرجت نظيفة يبقى كده استوت كويس.
8- طلّعيها من الفرن، وفكي الخيط من عليها، وحطيها على طبق التقديم، وقدميها مع رز بالخلطة.. بالهنا والشفا.

*************************

كيك بصوص الزبادي
كيك بصوص الزبادي
المقادير:
2 كوب ونصف سكر
2 كوب ونصف دقيق
3 ملاعق صغيرة بيكنج بودر
كوب زيت زيتون أو ذرة
3/ 4 كوب عصير برتقال
كوب زبادي صغير
4 بيضات
رشة فانيليا
بشْر ليمونة
رشة ملح
مكونات الصوص:
كوب زبادي
1/ 4 كوب عسل أبيض
ملعقة كبيرة عصير ليمون
الطريقة:
1- اخلطي كل المكونات مع بعض مرة واحدة في العجانة أو بالمضرب الكهربائي، واضربيهم كويس أوي لحد ما يمتزجوا.
2- ادهني القالب بزيت أو زبدة وصبي الخليط فيه، ودخّلي الكيك في فرن على درجة حرارة 200 لمدة 30 : 40 دقيقة، وعلشان تتأكدي إنها استوت ممكن تدخّلي فيها سكينة أو خِلة، ولو خرجت نظيفة يبقى استوت.

3-بعد كده اعملي الصوص؛ وده بإنك تخلطي كل المكونات مع بعض كويس أوي، وبعدين حطّيها على الكيك بعد ما تخرّجيها من القالب. وقدميها بالهنا والشفا.

خلصت وصفاتنا النهارده..
استنونا في يوم جديد من أيام العيد..
مع أكلة جديدة..
سلام،،،