بالصور.. في معرض شريف مدكور التراث بروح عصرية

عدسة: هند صلاح نور ومحمد صلاح
"الموضة مش كلام فاضي وتضييع وقت، لكنها صناعة، لو اهتمينا بها ممكن توفّر لمصر دخل كبير؛ ده غير إن عندنا مصممين غير عاديين بيقدّموا تصميمات مستوحاة من ثقافتنا وتراثنا العربي اللي أتمنى إنه يبقى موجود في كل بيت مصري".
دي الأسباب اللي دفعت الإعلامي شريف مدكور لاستضافة بعض المصممين المصريين في الجاليري الخاص به؛ علشان يوفّر لهم الفرصة لعرض تصميماتهم وأعمالهم المميزة جدا.
وفي تصريحات خاصة ل"بص وطل" أكّد شريف أن هدفه الأساسي من المعرض هو تشجيع المصممين المصريين على الابتكار والإبداع، واستغلال التراث المصري في تقديم موضة مميزة خاصة بمصر.
وأضاف: "أنا هافضل ورا الناس اللي بتقدّم حاجة مختلفة، وكل ما هاكتشف مصممين أكتر هاقدّمهم معايا في البرنامج، وهاعمل لهم معارض خاصة بهم، وهاعرّفهم على مواقع زي "بص وطل"، علشان أنا هدفي إني أدّيهم الفرصة لعرض أعمالهم".
ولما سألناه إيه المكسب اللي بيعود عليه من تقديم المعارض دي؛ قال: "مش لازم أكون مستفيد حاجة.. أنا الفايدة بالنسبة لي إنهم يشتهروا ويتعرفوا؛ لأننا لو فضلنا نفكّر بالطريقة دي مش هنتطوّر أبدا، ولو كنت مشهور فعلا فده لأني عندي رسالة".

إضغط لمشاهدة الفيديو:
المعرض قدّم تشكيلة كبيرة لتصميمات متنوّعة؛ زي: الملابس، والإكسسوارات، والتحف، والأشجار المجففة، والإيشاربات، والإكسسوارات المنزلية، وقطع ديكور.
وعلى الرغم من تنوّع التصميمات واختلافها؛ فإنها كلها كانت بتجتمع على فكرة واحدة؛ وهي إحياء التراث المصري والعربي.
يعني هتلاقي: القفطان المصري، وصواني القهوة النحاس، والكردان الفضة، والرسومات البدوية، والحروف العربية... كلها مستغلّة بشكل يتناسب مع الروح العصرية مع الحفاظ على هويتنا العربية.
المعرض استمرّ لمدة ثلاثة أيام من يوم الخميس 20 أكتوبر، وحتى يوم السبت 22 أكتوبر، وكاميرا "بص وطل" كانت هناك، ودلوقتي تعالوا ناخد جولة سريعة في المعرض...

إضغط لمشاهدة الفيديو:

*************************

معرض شريف مدكور للتراث العربي
* صحة وجمال
اضغط على الصورة لمشاهدة الجاليري:


معرض شريف مدكور للمصممين المصريين
* صحة وجمال
اضغط على الصورة لمشاهدة الجاليري: