البنت دائماً بتحب التغيير والموضة في كل شيء، وخصوصاً الحلي اللي بيتطور بشكل كبير في أشكاله وتصميماته، وبيعمل نوع من الإبهار والأناقة، وأصبح مكمل أساسي لأي لبس... وعلشان كده استضفنا مصممة الحلي "نرمين فاروق".. وسألناها: * في البداية عايزين نتعرّف إزاي بتستمدي أفكارك في تصميم الحلي؟ أنا خريجة فنون تطبيقية، ومن صغري وأنا بحب المجال ده؛ لأن والدي جواهرجي معروف، وما زلت بادرس وأشوف معارض كثيرة خارج مصر علشان أتعرّف على أفكار العالم والتصميمات العالمية. أما بالنسبة لأفكار تصميماتي ففي البداية باقوم برسم الفكرة على الورق، وبابدأ أنفّذها، وأهم مصادر إلهامي هي الطبيعة بأنواعها وأعمل (ميكس) بالألوان الخاصة بالحلي من (ميكس ألوان الطبيعة) زي السمك, الزهور, والورود, وأي حاجة طبيعية، وكل ألوان الأحجار الطبيعية في تصميماتي بتكون من تأثري بهذه الألوان، علشان كده بتكون لافتة ومبهرة للناس؛ لأنها مستمدة من ألوان الطبيعة. * لكن إيه اللي بيميّز تصميماتك عن الآخرين؟ معظم تصميماتي بتكون مستمدة من فنون مختلفة زي الفن القبطي المصري والشعبي، بالإضافة إلى كل الفنون الحديثة، وأستوحي منها أفكار، يعني ممكن خط دائري أو شكل هندسي أو تيمة فرعونية أو هندسية. * لكن إنتِ شايفة إن مصمم الحلي هو اللي بيعرض الموضة على الناس؟ أنا بتأثّر بالموضة، لكن أفكاري هي اللي بتفرض نفسها على الخامة والتصميم، وكل مصممي الحلي بتكون لهم أفكار مختلفة عن بعضهم، وبيعملوا تنويعة متكاملة من التصميمات اللي ترضي كل الأذواق، وفي كل الأوقات، وفي النهاية مصمم الحلي هو اللي بيفرض الموضة على الناس تلقائياً وبطريقة غير مباشرة. ممكن ندخل كل خامات الأحجار مع بعضها
* إيه الخامات اللي تتناسب مع بعضها في تصميم وحدة الحلي؟ دلوقتي كل الخامات ممكن تتداخل مع بعضها بحرفية، لكن بالنسبة للمعادن ففيه خامات بتتناسب مع بعضها؛ فمثلاً الذهب يتناسب مع الفضة، والنحاس مع الفضة، واللولي مع الفضة، ومن الأفضل تكون الفضة مطلية، أما بالنسبة لخامة الأحجار فمن الممكن أن نُدخل كل خامات الأحجار مع بعضها، لكن بنراعي الألوان وفي نفس الوقت تكون بأشكال وأحجام مختلفة. * الموضة دلوقتي.. الإكسسوار الطويل أم القصير؟ فيه إكسسوارات لازم تكون قصيرة وإكسسوارات تانية سهلة إنها تطول.. وأنا شايفة إن الموضوع ده بيرجع على حسب اللبس وموديل الفستان أو البلوزة بالإضافة كمان لحجم الرقبة، يعني التونيك بيتناسب معاه جداً السلاسل والإكسسوارات الطويلة، أما التي شيرت والفستان والجاكت يتناسب معهم الحلي القصير والكوليه، ودائماً باوجّه العميلة إلى حجم الإكسسوار حسب رؤيتي لشكلها واستايل لبسها. * وبالنسبة للبنت المحجبة إزاي تتعامل مع الإكسسوار؟ أنا دايماً بانصح البنت المحجبة إنها تغير شوية وتلبس بروش وإكسسوارات ثابتة بتكون نهاية الطرحة على الصدر، وفيه أشكال دلوقتي من البروشات جميلة ومبهرة بتكون نازل منها أحجار وأشكال مختلفة. وفيه أشكال لكوليهات طويلة موضة جداً دلوقتي وفيها قطعة فضة من الجانبين بتكون شيك وقيّمة وفي نفس الوقت طويلة مع الحجاب. هلال شعبي مكتوب بداخله "ربِّ اشرح لي صدري"
* كلمينا عن المعارض اللي بتشاركي فيها وخصوصاً المعرض الأخير للحلي الشعبي؟ أنا اشتركت في العديد من المعارض الفردية والجماعية زي مثلاً معرض "بداية" بقاعة الفنون التشكيلية بمسرح الجمهورية، ومهرجان "فن الحلي" بمركز الجزيرة للفنون. والمعرض المصاحب للقمة العالمية والفن أواصر العرب بقصر الأمير طاز، ومعرض "نانسي" الدولي بفرنسا. وقدّمت في آخر معرض لي بقاعة الفنون بالجزيرة تشكيلة مختلفة مزجت فيها بين الفن الشعبي النوبي والقبطي والإسلامي. فمثلاً تصميم لشكل هلال شعبي وكتبت بداخله "ما شاء الله" أو "ربِّ اشرح لي صدري" أو تصميم لسمكة؛ لأنها رمز من رموز الفن القبطي، ووجدت أن البنات بيقبلوا على هذه التصميمات؛ لأنها تمثل نوعاً من الثقافات التي ينتمون إليها، ومن ناحية أخرى شكل جديد ونوع من الأمان والحرز. * هل الكوليه أو العقد لازم يكون من نفس خامة الخاتم والإسورة؟ أهم حاجة إن الكوليه يكون متماشي مع الحلَق، لكن ممكن نغيّره عن شكل الخاتم والانسيال أو الغويشة، وفي نفس الوقت يكونوا متماشين مع بعضهم، لكن مش من المناسب إني ألبس كوليه أحجار وألبس حلق ذهب أصفر مثلاً، وبافضل أن تكون القطع والأحجام الكبيرة في منطقة واحدة بس؛ يعني ألبس غويشة أو خاتم كبير مع كوليه صغير. * إزاى البنت تميّز بين الحلي الأصلي والتقليد؟ أول حاجة إنها تشتري الحلي من أماكن معروفة وموثوق فيها، بالإضافة إلى إن الفضة بتكون "مدموغة"، أما النحاس فكل ما كان سميك بيكون أصلي، أما بالنسبة ل"اللولي" فيمكن اختباره عن طريق التقشير، فاللولي الزراعي الطبيعي لا يتقشر مثلاً بالأسنان، أما اللولي البلاستيك فسهل تقشيره، أما الأحجار فمن الصعب جداً اختبار طبيعتها. البشرة الفاتحة يتناسب معها الألوان الغامقة * وإيه أنواع الأحجار المختلفة علشان البنت يكون عندها ثقافة الشراء؟ بجانب اللولي والعقيق هناك أحجار زي "التورمالين" وموجود به كل درجات "البطيخي", وحجر "أماتيست" وهو درجة الموف الغامق، أما "الفيروز" فمنه تركواز وده بيكون مناسب جداً مع العقيق ومع الملابس الجينز. وهناك "المرجان" بدرجات البحر الفاتح والغامق، بالإضافة إلى حجر "الأونكس" ويتميز باللون الأسود، وهناك أحجار عديدة مثل "الروزكوارتز" و"الملا كايت" و"لابس لازولي" و"الاسترين" و"عقيق الجدر"... وكلها أنوع أحجار مختلفة، وعلى البنت إنها تسأل عن الأنواع دي وتتعرف عليها وتشوف إيه اللي يناسبها في الأشكال والأسعار. * إيه طرق تنظيف الحلي وإزاي نحافظ عليه؟ بالنسبة ل"اللولي" والأحجار لا نضع عليهم أي كيماويات، ويستحسن ننظف اللولي بزيت البرافين، أما تنظيف الفضة فبيكون بالكربونات، وبانصح عند وضع الحلي وخصوصاً الأحجار أفصل بينهم بقطعة قماش، ومن الأفضل أن نضع كل الحلي في أدراج واسعة بحيث يكونوا متفرقين عن بعضهم. * إيه النصائح اللي ممكن تقدّميها للبنت في اختيار الحلي المناسب لها؟ بلاش أي بنت تمشي وراء الموضة، وأهم حاجة إنها تختار الحلي بناء على ذوقها ولبسها وجسمها ولون بشرتها، ولازم عينيها ترتاح للإكسسوار اللي بتختاره، وكمان فيه حاجات معينة بتختار على أساسها، فمثلاً... - لو البنت رقبتها قصيرة تلبس التصميمات الطويلة، والعكس كمان لو رقبتها طويلة تلبس التصميمات القصيرة. - لو البنت لابسة حاجة مشجّرة أو مقلّمة تبعد عن الكوليه والسلاسل وتلبس أنسيال أو غويشة وخاتم فقط، ولو لابسة حاجة سادة تحاول تختار قطع كبيرة وألوان متعددة داخل وحدة الحلي. - لو البنت خارجة الصبح، فاللولي والفضة غير اللامعة هي التي تتناسب في الصباح، وعلى العكس الفضة اللي فيها فصوص تتناسب بعد الظهر، أما في السهرات والمناسبات فالحلي اللي بيكون فيه استراس بتكون مناسبة جداً. - لو البنت لون بشرتها فاتح، فبيتناسب معها الألوان الغامقة، أما بالنسبة للبشرة السمراء فيتناسب معها الألوان الهادئة غير الصارخة. الإكسسوارات ثقافة وشياكة.. وحُسن اختيارها دليل الأناقة * صحة وجمال اضغط على الصورة لمشاهدة الجاليري: ولغاية هنا خلص عددنا النهارده... واستنونا في الأعداد القادمة،،،
