جمالك بالألوان.. مع "جيلان"

وعدناكم إننا هنقدّم لكم مفاجأة جامدة جداً جداً جداً..
لكل البنات اللي عايزين يهتموا بشكلهم ويعملوا لنفسهم استايل متميّز..
ويعرفوا أسرار الماكياج زي المحترفين بالظبط، خصوصاً البنات المحجبات اللي بيحتاروا في اختيار الملابس وفي لفات الطرح..
ومفاجئتنا ليكم هتكون خبيرة التجميل ومصممة لفات الطرح والاستايلست المعروفة "جيلان عاطف" اللي هتكون معانا ومع كل بنات "قمر 14" علشان تعرّفكم على أسرار الجمال والموضة..
وتجاوبكم على كل الأسئلة اللي دايماً بتحيّركم وإنتم بتختاروا ملابسكم أو وإنتم بتعملوا الميك أب بتاعكم في أي مناسبة، من خلال حلقات مصوّرة هتُعرض ابتداءً من يوم الإثنين القادم على "قمر 14"..
وعلشان تتعرّفوا على ضيفتنا المتميّزة أكتر، وتعرفوا عنها حاجات أكتر كان لنا معاها لقاء سألناها فيه عن حاجات كتير..
هل دراستكِ الأساسية لها علاقة بالميك أب والموضة؟
لا خالص.. أنا اتخرّجت في كلية تجارة إنجليزي جامعة القاهرة، وتخصصت في إدارة الأعمال.
طيب ليه ما فكرتيش تشتغلي في نفس مجال دراستك، واتجهتِ لعالم التجميل والموضة؟!
أنا لما اتخرّجت ما كنتش عايزة أشتغل موظفة في شركة أو في مكتب، وكنت من صغري بحب المجال ده، وكنت عايزة أرتقي بذوق البنت المصرية المحجبة، وخصوصاً لما كنت باشوف أصحابي وهما خايفين يتحجبوا؛ لأنهم مقتنعين إن البنت المحجبة لازم تبقى مبهدلة في نفسها ومش على الموضة، وكان الموضوع ده بيسبب مشاكل لناس كتير، وكمان العرايس اللي كان معظمهم بيضطروا يظهروا بشعرهم يوم فرحهم؛ لأنهم خايفين إن شكلهم ما يبقاش حلو بالحجاب، علشان كده اهتميت بالبنت المحجبة، وإزاي أظهرها بشكل شيك ومتميّز وفي نفس الوقت يكون في حدود اللبس المناسب مع الحجاب.
عملتِ إيه علشان تشتغلي كخبيرة تجميل متخصصة؟!
أنا من زمان وأنا عندي موهبة تنسيق الألوان والملابس مع بعضها، كنت بحب دايماً يبقى ليّ استايل متميّز ومختلف، وكمان كنت بحب أدخّل ألوان مختلفة من ألوان الميك أب مع بعضها..
وبعد ما اتخرّجت قررت إني أدعّم الموهبة دي بالدراسة المتخصصة، فأخدت كورسات كتير في أماكن متخصصة، ومنها كورسات في شركة ماك MAC في ألمانيا، وشركة بورجوا POURJOIS، وعملت سيمينارات في شركات زي شركة إيف سان لورانYves saint Laurent، وشركة إستي لودر Estée Lauder، وكلها طبعاً شركات عالمية ومتخصصة ومعروفة جداً، واتعلمت هناك أصول الميك أب، أما بالنسبة لربطات الطرح فدي أنا اللي بابتكرها وباطوّر فيها بأفكاري الخاصة وحسب اللي باشوفه مناسب لكل بنت.
بدأتِ تشتغلي كمحترفة وخبيرة تجميل متخصصة من امتى؟!
أنا بدأت في المجال من سنة 2005 والحمد لله في الفترة دي قدرت أحقق نجاح كبير، وبقى ليّ اسم معروف في مجال التجميل وخاصة المحجبات؛ لأني باهتم بهم أكتر.
وفي الفترة دي ظهرت في عدد كبير من البرامج التليفزيونية على قنوات دريم والمحور، وظهرت في برنامج "بيت شريف" و"سيدتي والنص الحلو" و"المرأة في الإسلام"، وكمان في برنامج أمينة شلباية عملت حلقات كتير وهاظهر في حلقات تانية معاها في شهر 6، وظهرت على قنوات خارج مصر زي قناة الحرة الأمريكية، وإن شاء الله هيتعرِض ليّ لقاء على قناة الTRT التركية يوم الخميس الموافق 19 مايو الساعة 11 صباحاً على الهواء.
إيه رأيك في ملابس البنات المحجبات دلوقتي؟!
دلوقتي الحمد لله البنات المحجبات أصبحوا على قدر عالي جداً من الشياكة والتميّز، وبقى فيه شركات عالمية كتير بتعمل خطوط إنتاج خاصة للمحجبات، وكمان باحس إن استايل المحجبات دلوقتي بقى أفضل وبقى مرتّب ومنسّق أكتر من الملابس العادية.
بنسمع كتير كلمة "خبيرة تجميل"، يا ريت توضّحي لنا معنى التجميل من وجهة نظرك؟!
التجميل: هو إظهار مناطق الجمال عند أي بنت، لكن من غير مبالَغة أو تكلّف؛ لأن الجمال الحقيقي هو جمال الروح اللي بيطلع من الداخل وبيظهر على الوش والبشرة والابتسامة الرقيقة، لكن مش بيظهر بالماكياج الصارخ أو باللبس اللافت، لكن لازم البنت تهتم بإن مظهرها بشكل عام يكون متناسق مع بعضه يعني الماكياج الرقيق مع لفة الطرحة المناسبة مع وشها مع الملابس والإكسسوارات.
طيب إيه النصيحة اللي تحبي تقوليها لأي بنت محجبة؟!
للأسف أنا دلوقتي بقيت باشوف بنات كتير لابسين الحجاب، لكن مش بشكل مناسب مع تعاليم الحجاب والقواعد المفروضة، يعني بلاقي بنات لابسين بنطلونات "ليجنج" وعليها بادي ضيق وعليهم الطرحة، وطبعاً ده مش مناسب خالص.
وعلشان كده أول نصيحة أحب أقولها لأي بنت إنها ما تلبسش الحجاب إلا لما تكون مقتنعة به تماماً، كمان لازم البنت تختار الألوان اللي بتليق عليها وتعمل الربطات اللي تكون مناسبة مع وشها؛ علشان شكلها العام يكون متناسق وأنيق.
إيه هي القواعد اللي إنتِ شخصياً بتمشي عليها علشان تحافظي على جمال ونضارة بشرتكِ؟!
أهم حاجة باخد بالي منها جداً هي الأكل الصحي وأكل الخضار والفاكهة الطازة، وباحاول على أد ما أقدر أبعد عن المشروبات الغازية والوجبات السريعة، وكمان باهتم جداً بشرب المية؛ لأن المية بتحافظ على نضارة ورطوبة البشرة.
إزاي البنت تقدر تحافظ على بشرتها مع الميك أب؟!
الميك أب مش هيضر البشرة لو استعملناه بطريقة صحيحة، ولازم نعرف إن أخطر حاجة على البشرة هي إننا نحط ميك أب تقيل وننزل به في الحر؛ لأنه هيضر بشرتنا جداً وخصوصاً مع أشعة الشمس القوية اللي هنتعرّض لها، ومع الجو اللي بقى مليان تراب اليومين دول.
علشان كده أنا بانصح أي بنت نازلة الصبح رايحة الجامعة أو الشغل إنها تكتفي بميك أب خفيف جداً عبارة عن ماسكرا وليب جلوس (ملمع شفاة) وأحمر خدود على خفيف؛ علشان تحدد ملامح وشها، ومش لازم ننسى طبعاً الصن بلوك (واقي الشمس) علشان نحافظ على بشرتنا من الشمس.
وطبعاً لازم نتأكّد من ماركات الميك أب اللي بنستعملها علشان ما نستعملش حاجات تضر بشرتنا، ومش باقول إننا لازم نجيب حاجات غالية أوي، لكن على الأقل نبقى واثقين من المصدر.
بتنصحي أي عروسة إنها تبدأ تهتم ببشرتها قبل الفرح بمدة أد إيه؟!
لازم العروسة تبدأ تهتم ببشرتها وتعمل ماسكات تغذية وترطيب قبل الفرح بحوالي 6 شهور، وتحاول على أد ما تقدر إنها ما تتعرّضش للشمس كتير، ولو مضطرة تنزل في الشمس يبقى لازم تحط صن بلوك بمعامل حماية قوي، ولازم تتبع روتين يومي بإنها تستخدم منظف كويس وتونر وكريم ليل ونهار، وزي ما قلنا قبل كده لازم تشرب مية كتير وتنام كويس وتبعد عن أي إجهاد أو توتر، علشان بشرتها تبقى صافية يوم الفرح.
إيه هي الماسكات اللي تنصحي البنات إنها تعملها؟!
الماسكات الطبيعية طبعاً مفيدة للبشرة، وفيه ماسكات أساسية لازم نعملها زي ماسك الزبادي والخيار لتفتيح وترطيب البشرة، وكمان شرائح الخيار وكمادات الشاي لمنطقة الهالات السوداء.
بتختاري ماكياج العروسة على أي أساس؟!
طبعاً العروس لازم تكون مميزة وبسيطة في نفس الوقت، وقبل ما باعمل الماكياج لازم الأول أعرف موديل الفستان ولونه وكمان نوعية الإضاءة اللي هتكون موجودة في القاعة أو المكان اللي هتعمل فيه الفرح، وهل الفرح هيكون بالليل أو بالنهار؛ لأن الإضاءة مهمة جداً في تحديد شكل الماكياج، فمثلاً مع الإضاءة الهادية زي اللي بتكون موجودة في السهرات باحاول أعمل ماكياج قوي وصريح علشان أبيّن جمال الوجه، وفي الإضاءة القوية بافضل الماكياج البسيط الهادي علشان وش العروسة يبان طبيعي وجميل في نفس الوقت.
في النهاية تحبي تقولي إيه لكل بنات "قمر 14"؟!
أحب أقول لهم إني مبسوطة بجد إني هاكون معاكم من خلال الموقع المحترم والمتميز جداً موقع "بص وطل"، وأتمنّى إني أقدر أفيدكم، ويا ريت تتابعوني وتبعتوا رأيكم وتعليقاتكم على حلقات "جمالك بالألوان مع جيلان" اللي هتتعرض أسبوعياً، وكمان هاستنى أسئلتكم واستفساراتكم وكل طلباتكم علشان أرد عليها.

جمالك بالألوان.. مع "جيلان"
* صحة وجمال
اضغط على الصورة لمشاهدة الجاليري: