خطوات مدروسة.. لعمل ماكياج العروسة

أهلاً بيكم معانا في حلقة جديدة من "بص وطل"..
والنهارده هيكون لنا لقاء مع خبيرة التجميل "أميرة أحمد"..
اللي هتقدّم لنا بالتفصيل خطوات وضع ماكياج عروسة بشكل عربي صريح..
يلّا نشوف مع بعض..
توزيع كريم الأساس
كريم الأساس اللي بيستخدم للعروسة لازم يكون تقيل شوية علشان يثبت معاها لوقت طويل، وبنأكد تاني على ضرورة اختيار لون كريم الأساس المناسب مع لون بشرتنا..
وبنبدأ نوزّع كريم الأساس بالفرشة أو الإسفنجة الخاصة به وأهم حاجة إننا نوزّعه كويس على البشرة علشان الوش يكون شكله طبيعي وما يبقاش شكله مجيّر، وبنوزّعه على الوش كله ما عدا الزاوية اللي تحت العين.
نصيحة لاختيار كريم الأساس الجيد
دي نصيحة ممكن أي بنت تعملها علشان تعرف تفرّق بين نوع كريم الأساس الجيد من الرديء.. وكل اللي عليها إنها لما تيجي تشتري كريم الأساس تجرّبه الأوّل على منطقة الرسغ أو المنطقة اللي بيكون ظاهر فيها العروق الزرقاء في الإيد، وتشوف إذا كان هيقدر يخفي العروق دي ولا لأ..
مش بس كده، دي لازم تسيبه على إيديها لمدة ما بين ربع ساعة لساعة، وبعد كده تشوف إذا كانت العروق دي هتبان ولا لأ، ولو العروق ما ظهرتش بعد المدة دي يبقى كريم الأساس ده هايل أما لو بانت يبقى النوع ده مش كويس.
الكونسيلر لمنطقة تحت العيون
نيجي للخطوة التانية، وهي إننا نداري أي هالات أو علامات للإرهاق تحت العين بإننا نوزّع الكونسيلر في المنطقة دي، وندمجه كويس مع كريم الأساس الموجود على باقي الوش باستخدام الإسفنجة الخاصة به.
توزيع اللوس باودر (البودرة السايبة)
اللوس باودر أو البودرة السايبة اللي بتتحط تحت العين بتكون أفتح بدرجة من لون البشرة، وبتكون مايلة للاصفرار علشان تديني اللون المطلوب؛ لأن منطقة تحت العين دايماً بتبقى أغمق من البشرة كلها.
أما بقى لما نيجي نوزّع البودرة على باقي الوش؛ فإحنا ممكن نخلط ما بين البودرة الفاتحة والبودرة الطبيعة اللي هي بنفس لون بشرتها علشان نفتح بشرتها شوية؛ لأن الموديل اللي معانا بشرتها سمرة شوية، وبنستخدم طريقة الطبطبة وإحنا بنوزع الباودر، وبناخد بالنا إننا ما نحطش كمية كبيرة من الباودر علشان ما تعملش خطوط على الوجه، وبعد ما ننتهي من توزيع البودرة بنبدأ نشيل البودرة الزيادة باستخدام الفرشاة.

إضغط لمشاهدة الفيديو:
طريقة رسم العيون الصغيرة
هنبدأ في رسم العينين، وعلشان الموديل اللي معانا مساحة عينيها صغيرة؛ فإحنا هنحتاج إننا نوسع لها جفنها بطريقة معينة عشان العين تبان واسعة، وكمان هنرسم بالكحل من تحت ومن فوق العين علشان يدّينا وسع، وبنحدد العين من جوه بقلم كحل أزرق..
وفي الرسمة اللي هنعملها دي هنستخدم 4 ألوان وهم..
الموف غامق.. وده بنوزّعه على الجفن المتحرّك، وممكن إننا نبلل الفرشاة اللي بنحط بها اللون بشوية ميه علشان تثبت اللون معانا وتتقّله.
الأسود.. وده بنرسم به خط رفيع جداً على خط الرموش وبنسيّحه كويس مع اللون الموف، وبنسحبه من عند آخر العين لبره مع اللون الموف بطريقة غير محددة (مموّهة) علشان تدينا وسع للعين.
الروز فاتح.. وده بنحطه فوق اللون الموف الغامق عند منطقة قوس العين، وبنسيّحه كويس وندمجه مع اللون الموف.
البرونزي.. وده بنحطه تحت الحواجب على طول علشان يدينا ضي حلو.

إضغط لمشاهدة الفيديو:
تركيب الرموش ورسم الحواجب
علشان الموديل اللي معانا رموشها خفيفة جداً؛ فإحنا هنحتاج نركّب لها رموش علشان شكل العين يوضح أكتر، وهنستخدم لها ماسكرا باللون البني الفاتح علشان لون حواجبها فاتح، وكمان علشان تمشي مع لون بشرتها، وبعد كده هنرسم الحواجب باللون البني باستخدام الشادو الخاص بالحواجب، ولما نخلص رسمة العين خالص، هنبدأ نشيل البودرة الزيادة الموجودة تحت العين باستخدام الفرشاة.

إضغط لمشاهدة الفيديو:
طريقة توزيع أحمر الخدود
ودلوقتي هنيجي لخطوة توزيع أحمر الخدود، بس لازم نعرف إن كل شكل وش وله طريقة معينة في توزيع أحمر الخدود، وعلشان الموديل اللي معانا وشها مليان شوية من عند الخدود؛ فإحنا هنستخدم أحمر خدود لونه غامق شوية، وهنحطه عند أسفل الوجه، ونسحبه من عند عظمة الفك ونطلع به لفوق، وبعد كده نسيّحه على الوش كله، وبعد كده بنحط لون برونزي على عظمة الأنف.
الروج وتحديد الشفاه
قبل ما نبدأ في رسم الشفايف لازم نرطّبها بزبدة كاكاو أو فازلين أو أي حاجة مرطبة علشان شفايفنا ما يبقاش شكلها جاف، وهنبدأ بعد كده نحدد الشفايف بقلم التحديد، بس هنراعي إننا نخرج بقلم التحديد شوية عن حدود الشفايف؛ لأن الموديل شفايفها صغيرة شوية، وبعد ما نحدد الشفايف هنرسم الشفايف نفسها بقلم التحديد؛ لأن ده بيساعد على تثبيت الروج على الشفايف لفترة طويلة، وبعد كده هنحط الروج على الشفايف، وفي النهاية هنحط الليب جلوس أو ملمع الشفايف واللي بيدينا ضي حلو جداً على الشفايف، وعلشان ندي للميك أب شكل سواريه شوية، هنوزّع على الوش كله بودرة فيها لمعة شوية.
نصايح لكل البنات
وآخر حاجة نحب نقولها لكل البنات اللي بيتابعونا إنكم لازم تهتموا ببشرتكم أكتر؛ علشان يبقى فيها نضارة وصحة، والاهتمام ده ممكن يكون بحاجات بسيطة جداً زي شرب الميه والاهتمام بأكل الخضار والفاكهة الطازة..
وفيه ماسك هايل ومكوّناته سهلة جداً وموجودة في أي مطبخ؛ وهو عبارة عن خليط من الموز والعسل واللبن، وده ماسك مفيد جداً للبشرة.

إضغط لمشاهدة الفيديو:

وفي النهاية نحب نشكر خبيرة التجميل "أميرة" على الميك أب الجميل اللي قدّمته لنا..
ونتمنّى إنكم تكونوا استفدتم معانا..
وفي انتظار آرائكم واستفساراتكم..
وإلى اللقاء مع حلقات جديدة،،،،