ميني كيك بالليمون والفواكه المجففة على "سفرة دايمة"

وصفتنا النهارده لكل عشاق الليمون عبارة عن ميني كيك بالليمون والفواكه المجففة، جرّبوها وماتنسوش تبعتوا لنا رأيكم فيها، وكمان كل أسئلتكم والوصفات اللي عايزين تعرفوها.
ميني كيك بالفواكه المجففة
المقادير:
* بيضة
* كوب لبن
* 2 كوب دقيق
* 1/ 4 كوب سكر
* كوب فواكه مجففة
* 4 ملاعق كبيرة زبدة
* ملعقة كبيرة بشر ليمون
* 2 ملعقة صغيرة بيكنج باودر
* 2 ملعقة كبيرة عصير ليمون
* ملعقة كبيرة عصير ليمون أو خل
* بيضة + ملعقة صغيرة ميه للدهن
* سكر للتزيين
الطريقة:
1- سخني كوب اللبن وحطي فيه عصير الليمون أو الخل وغطيه وسيبيه لمدة 5 دقائق.
2- اخلطي الدقيق مع السكر والبيكنج باودر والفواكه المجففة، وبعد كده افركيهم بالزبدة.
3- اخلطي 3/ 4 كوب من اللبن مع البيض وعصير الليمون وبشر الليمون وبعدين صبيه على خليط الدقيق وقلبيه كويس لحد ما الخليط يبقى فتات ناعم.
4- افردي الخليط على ورق بلاستيك لحد ما يبقى سُمكه 2 سم، وبعدين لفيه باستخدام الغلاف البلاستيك مع الضغط عليه؛ علشان العجينة تبقى متماسكة ويتكون شكل أسطواني.
5- قطّعي العجينة قطع صغيرة بالسُمك اللي إنتي عايزاه ورصّيها في صينية على ورق زبدة أو في قالب سيليكون، وبعدين ادهنيها بخليط البيض والميه، وبعدين رشّي عليه السكر.
6- دخّليها في فرن ساخن لمدة 18 : 20 دقيقة لحد ما يبقى لونها دهبي، ممكن تختبريها بإنك تدخلي فيها سكينة أو خلة، ولو خرجت ناشفة يبقى استوت وتقدري تخرجيها من الفرن، وتقدميها بالهنا والشفا.
ملحوظة: ممكن تشكليها بالشكل اللي إنتي عايزاه أو ممكن تحطيها في قالب فرن وتدهنيها ورشي السكر عليها.

خلصت وصفتنا النهارده..
استنونا مع وصفة جديدة..
وابعتوا لنا كل طلباتكم على "سفرة دايمة"..
سلام،،،