وصفتنا النهارده على "سفرة دايمة" هتكون عبارة عن تارت بقطع الفراولة، هنقدمه لكم بطريقة سهلة وسريعة، وكمان مكوناته متوفرة جدًّا وبسيطة. تارت الفراولة المقادير: * 3 كوب دقيق * 2 بيضة * كوب زبدة * رشة فانيليا * كوب سكر بودرة * ملعقة صغيرة بشر ليمون * 1/ 4 ملعقة صغيرة قرفة * ذرة ملح لعمل الحشو: * 2 بيضة * 3 كوب لبن * 2 صفار بيض * رشة فانيليا * 1/ 2 كوب نشا * 1/ 2 كوب سكر * ملعقة صغيرة بشر ليمون * قطع فراولة الطريقة: 1- اضربي السكر والزبدة بالمضرب أو في الخلاط لحد ما يبقى قوامه كريمي، وبعدين ضيفي البيض والفانيليا وبشر الليمون، واستمري في الخفق لحد ما يتجانس تمامًا. 2- انخلي الدقيق واخلطيه مع الملح والقرفة، وحطيه على الخليط السابق تدريجيًّا، وقلّبيه لحدّ ما تتشكل عجينة مفتتة مش متماسكة أوي. 3- رشّي الرخامة بالدقيق، واعجني العجينة بإيديك كويس أوي لحدّ ما تشكل عجينة ناعمة، وبعدين شكّليها لكرات صغيرة، وحطيها في القوالب اللي هتستخدميها، وبعدين دخليها التلاجة لمدة ساعة قبل ما تسويها. 4- بعد الساعة استخدمي شوكة وشكّلي في العجينة ثقوب كتير، وبعدين حطي في كل قالب قطعة ورق زبدة وحطي عليها حبوب فاصوليا؛ علشان تشكل ضغط عليها وهي بتستوي. 5- رصي القوالب في صينية ودخليها الفرن على درجة حرارة 190، وسيبيها لمدة 8 : 10 دقائق، أو لحد ما العجينة تبقى لونها دهبي. 6- في الوقت ده حضّري الحشوة؛ حطي كوبين ونصف من اللبن في حلة صغيرة، وخليه يغلي على نار هادية. 7- في وعاء اخلطي نصف كوب اللبن مع النشا والسكر والبيض وصفار البيض والفانيليا وبشر الليمون، وقلبيهم كويس لحد ما يمتزجوا مع بعض. 8- بعدين صبي عليه اللبن المغلي وقلبيه بسرعة لحدّ ما الخليط يتجانس، وبعدين رجّعيه تاني على نار متوسطة لحد ما يشكّل قوام كريمي، وبعدين صفّيه وحطّيه في التلاجة لحد ما يبرد تمامًا. 9- بعد ما التارت يستوي طلّعيه من الفرن، وسيبيه يبرد، وبعدين خرّجيه من القوالب، وبعد ما يبرد تمامًا ابدئي وزّعي الحشو على التارت. 10- وزعي قطع الفراولة عليها وممكن تزينيه بجيلي التلميع أو بالمربى؛ علشان تدي له طبقة لامعة وحطيه في التلاجة، وبعدين قدميه بالهنا والشفا.
خلصت وصفتنا النهارده.. استنونا مع وصفة جديدة.. وابعتوا لنا كل طلباتكم على "سفرة دايمة".. سلام،،،
