معرفة تجيب حب

أنا عندي 22 سنة كنت مشتركة في دورة تدريبية فترة شهر ونص واتعرفت خلالها على شاب أصغر مني بسنة من خلال عمل جماعي طلبه منا المسئول عن النشاط ده، وبالتالي خد كل واحد إميل التاني عشان نعمل المطلوب مننا، وقال لي بعد كده إنه ما كانش عايز يبقى فيه مجموعة فيها بنات عشان البنت اللي متقدم لها، وإنه بيحس بذنب لو كلم بنت غيرها؛ المهم إننا بقالنا 9 شهور بنتكلم على النت بس كنت في البداية معجبة بإخلاصه للبنت اللي بيحبها ما كانش بيحكي عنها غير نادر جدا، كان فيه تقارب بيننا في الأفكار ووجهات النظر والاهتمامات، كمان كنت باستفيد من آرائه جدا.
بعد 3 شهور تقريبا قال لي إنه معجب بي؛ فسرت الموضوع إن ممكن يكون فيه مشاكل بينه وبين خطيبته، وفهمته إن ده بس وهم مش أكتر واتكلمنا عادي بعدها وسحب كلامه في وضوح؛ لكن من وقتها فيه حاجة بيننا فضلت تكبر لحد ما عرفت إن خطيبته بقى لها شهرين مش بتكلمه وإنها متغيرة معاه وإنه سابها. ومن أسبوعين اعترف لي إنه بيحبني؛ لكنه حاسس إن ده مش حب بجد لأننا مش بتعامل مع بعض؛ مجرد كتابة وبس، يعني مش تعامل يعرّفنا ببعض معرفة تجيب حب.
أنا مقتنعة بكلامه جدا؛ بس حاسة إن أكيد مش كل ده وهم أكيد في ولو جزء حقيقي. مش عارفة أعمل إيه نحاول نقرب من بعض على الواقع لما يرجع من سفره عشان هو مسافر يشتغل دلوقتي ولا الموضوع مش مستاهل تفكير أصلا أنا مش عايزة أعمل حاجة غلط، وبرضه حاسة إنه في معظم الحاجات اللي باحلم بيها؛ بس خايفة من موضوع السن ده يا ريت حد يفيدني.

popa