كل شوية باعايره إني باصرف عليه وباساعد أهله

شكرًا على الموقع الجميل، ودي مش أول مرة أشارك معاكم، ودايمًا بحب كل مواضيعكم جدًّا..
مشكلتي إني بحب جوزي جدًّا، هو كان زميلي، واتخطبنا بعد الدراسة على طول؛ برغم إن ظروفه كانت وحشة جدًّا زي أي حد لسه متخرج؛ بس أبوه وعده إنه هيجيب الشقة، وزوجي هو اللي يفرشها، وعندي في البيت اتفقوا على كده؛ بس بعد سنة من خطوبتنا رجع أبوه في كلامه، وقال إنه راجل ومسئول عن نفسه، وطبعًا لأني بحب خطيبي وقفت جنبه.
اتجوزنا بأقل حاجة ممكنة، ولحد النهارده لسه بنشتري أساسيات بيتنا، ومش هانكر إني دفعت كتير من فلوسي الخاصة علشان المركب تمشي..
المشكلة مش في كل ده.. أنا وجوزي بنحب بعض، وهو شايل لي الجميل ده وبيحبني جدًّا، المشكلة بقى في أهله؛ مافيش شهر يعدّي غير لما إخواته يتصلوا ويطلبوا طلب، أقل طلب بيكون بمبلغ كبير؛ بحجة إنهم محتاجين.. والمفروض إن مرتب أبوهم كبير؛ بس دايمًا فيه طلبات، وكل مرة أقول مازعّلش جوزي، وأسيبه يعمل اللي هو عايزه، وأصبح كل شيء بيتحل على حسابي بكل المقاييس.
لحد ما زهقت، وبقيت أجرحه وأعايره بكل شيء؛ حتى إني بقيت أفكّره إن كل جنيه اتصرف عليهم من فلوسي الخاصة، وده لأني -والله العظيم- استحملت كتير..
أنا تعبت، ومن الأول هو مافهمنيش كده؛ بالعكس، قال: إن أهله هيساعدونا في كل شيء، واللي حصل إن إحنا اللي بنساعدهم، وزوجي دخله مش كبير.. أنا بازعل لما باجرحه؛ بس والله ما سابوا لي أي طريق تاني..
أعمل إيه؟ لا قادرة أستحمل طلباتهم اللي مابتخلصش، ولا قادرة أستحمل طريقتي في جرحه كل شوية.. آه هو لما بازعّله مش بيقدر يديهم حاجة؛ بس ده على حساب علاقتي بيه وزعله مني.
frawa


لو عايز تفضفض لنا دوس هنا