ده قرار مصيري!!

أنا عندي 20 سنة في كلية تربية، أنا حبيت واحد من فترة كنت باشتغل في مجال الصحافة ووثقت فيه أوي، ما حصلش حاجة بينا، بس كنت بثق في كل كلمة بيقولها، ياما ناس كانت بتقول لي إنه مش بيحبك بس أنا كنت واثقة فيه عشان هو عنده 28 سنة وصاحب عمي، ما كنتش متخيّلة إنه بيلعب بيّ ونفس الكلام اللي بيقوله ليّ بيقوله لواحدة تانية معانا في المكتب.
أنا انهارت طبعاً ما كنتش أعرف إن في ناس كده، المفروض إني أمانة عنده بس في ناس وقفت جنبي وساعدتني إني أخرج من الأزمة دي منهم ابن عمتي؛ لأنه بيحبني جداً جداً جداً وهي دي المشكلة لو قعدت أوصف هو بيحبني قد إيه مش حقدر أوصف لكم عشان هو بيحبني من إعدادي، وتقريباً العائلة كلها عارفة أنا سبته ورجعت له كذا مرة وهو مش قادر يسبني، بيقول لي إنه بيعمل كل حاجة عشاني وإنه مش متخيّل واحدة تانية تبقى في بيته هو راجل وبيسافر وجهز فلوس الشقة وعايز يتقدّم لي رسمي الأيام دي، وأنا محتارة أوي في نصف من اللي حواليا بيقولوا لي خدي اللي بيحبك وبعدين ده منك وهيحافظ عليكِ، والنصف التاني بيقول لي ما تخديش حد إنتِ مش بتحبيه وإنتِ حاولتِ قبل كده وما عرفتيش خلاص، بس أنا باقول لهم إني مش هحب تاني أنا عارفة نفسي، وباقول لهم جايز لما أتخطب له أحبه عشان ما كانش في حاجة رسمي بينا قبل كده أنا محتارة بجد أرجوكم ردوا عليّ؟

حائرة