حيرتك مالهاش سبب.. وممكن تحتفظ بحبيبتك وصاحبك

أنا اتعرفت على إنسانة، وعرفت إن الإنسانة دي كانت بتتعامل مع صديق لي على سبيل الأخوّة، وأنا عرّفته بعلاقتنا لما عرفت إنها تعرفه.. عدّت فترة، وحبيت الإنسانة دي، وهي كمان حبتني.
بس المشكلة إن صاحبي ده زعل مني من ساعة ما حسّ إن الكلام بينّا بقى كتير، وبصراحة خايف أخسره، هو مش مجرد صديق ليّ، هو عشرة عمري كلها، وإحنا أكتر من الإخوات، ومتربيين مع بعض؛ فصعب عليّ إني أخسره، أو أخسر الإنسانة اللي حبيتها.. أنا صارحته، وقلت له: إن لو وجودها في حياتي هيسبب مشاكل بيني وبينه، أنا هابعد عنها؛ ردّ عليّ، وقال لي: عادي، مافيش حاجة.
بس أنا حاسس إنه اتغير في معاملته معايا، والإنسانة دي أنا حبيتها، وهي حبيتني، ومش عاوز أخسرها، ولا أخسر صديقي.
بجد مش عارف أعمل إيه.. محتار جداً، ونفسي ألاقي ردّ لده.

Zay elhawa

لو عايز تفضفض لنا دوس هنا