هو عصبي وأنا اللي باحرق دمه

السلام عليكم.. أنا في مشكلة كبيرة، أنا مخطوبة وباعشق خطيبي جداً، وباحاول كتير أرضيه؛ بس أوقات كتير لما بازعّله بيكون قاسي معايا في معاملته؛ يعني ممكن مايكلمنيش ويسيبني أرن له كتير على الموبايل، وساعات يقول لي: مش عايز أشوفك أسبوع.

باعترف إن أنا بازعّله ساعات، ولأنه عصبي، كتير بتكون ردة فعله قاسية جداً؛ مع إنه حنون؛ بس مش باعرف قسوته دي بيجيبها منين؛ يعني مهما اعتذرت وبكيت له واترجيته يسامحني؛ برضه بيعاملني بقسوة.

أوقات باحسّ إنه بيحبني جداً، وأوقات تانية أحسّ إنه بيكرهني.. أنا بجد تعبت نفسياً؛ لأني بحبه جداً، ومش باقدر أتحمل غيابه أو إني ماسمعش صوته.. أنا باعتبره كل حياتي، وباتمنى نتجوز بسرعة؛ بس خايفة، وباحلم بكوابيس دايماً إني لما هازعّله ممكن يقسى عليّ أكتر من كده لأنه عصبي.

أنا عاوزة أعرف أتصرف معاه إزاي؛ لأنه مهما حاولت أكون حذرة معاه، مش باعرف لأن اللي في قلبي على لساني، وده بيحببه فيّ؛ بس في نفس الوقت ده بيزعله مني في أوقات كتير.

يا ريت تُفيدوني أتعامل معاه إزاي لأني بجد مش عاوزة أخسره.. أنا باعشقه؛ بس عاوزاه يفهمني ويحسّ بيّ أكتر، وبافهم إني مش باقصد أزعّله أو أحرق دمه.

capten


صديقتي، حبك لخطيبك أدعى أن يجعلك أكثر حرصاً على عدم إغضابه، أو إثارة عصبيته، يجب أن نحدد دائماً ما يقال وما لا يقال، وكل شخص يعرف جيداً ما يمكن أن يضايق مَن أمامه؛ فحتى القطط عندما تخطف شيئاً من المطبخ؛ فإنها تأخذه وتجري، أما لو وضعتِ لها أكلها تقوم بأكله أمامك.. يجب أن تفكري جيداً قبل أن تقومي بأي تصرف يثير غضب خطيبك.

وهناك حقيقة ثابتة يجب أن تعلميها جيداً، وهي أننا عندما نتحدث مع شخص عصبي؛ فنحن نصنع أكثر من 50% من عصبيته!!

هتسألي: إزاي؛ إذا كان هو اللي بيثور ويتعصب؟

الإجابة في منتهى البساطة، إحنا بنفضل نقول له "إنت عصبي.. عصبي.. عصبي" بمناسبة وغير مناسبة، وإذا لم نستخدم هذه الكلمة بعينها استخدمنا جُمَلاً أخرى مثل: "إنت بتتعصب بسرعة، أنا مش هاقول لك كده عشان ماتتعصبش" وجمل كتير، لو قلتيها هتخليه يتعصب أكتر؛ فحاولي تتجنبيها قد ما تقدري، واعرفي إنك كده هتتجنبي 50% من غضبه وقتها.

أما الأمور الأخرى اللي لازم تراعيها وإنت بتتعاملي معاه وهو متعصب؛ فهي:
- عدم الاستمرار في مناقشة الموضوع نفسه عندما تبدأ ظواهر الانفعال في الظهور عليه.. وهذا لا يعني إطلاقاً أن تقبلي كل اللي بيقوله؛ لكن القصد هو تأجيل المناقشة لوقت ثانٍ.

- تاني حاجة اعرفي الطريقة اللي بيفضلها في النقاش؛ فهؤلاء الأشخاص -في الغالب- لا يُفضّلون سياسة الأمر الواقع, والتي هي أصلاً عادة سيئة في الحياة الزوجية؛ ولكنها غالباً ما تكون تحت تأثيرات أكثر سلبية مع الأشخاص الانفعاليين.

- اوعي تنفعلي مع انفعاله؛ فهذا يزيد الأمر سوءاً، واختاري الأوقات المناسبة للنقاش، يكون هو مستعد للاستماع لرأي الآخر وللحوار؛ يعني ماينفعش تروحي له الشغل مثلاً عشان تصالحيه؛ لأنه هيبقى تحت ضغط الوقت ورؤساؤه، وكمان هيفتكر المشكلة اللي بينكم.

- حاولي تفكّري شوية قبل تصرفاتك، وتتجنبي إثارة عصبيته، وتتجنبي عصبيته؛ يعني لو بيبعد شوية وبعدين بيهدأ وبيرتاح، خليه يعمل كده، وارجعي دايماً في الوقت المناسب.

- العصبية الزائدة بالفعل من العيوب التي قد تسبب للإنسان مشاكل كثيرة؛ لذلك حاولي في وقت صفائكما أن تقترحي عليه أن يقوم ببعض الأشياء للتخلص من هذه العصبية، مثل البعد عن كل ما يثير عصبيته أو يجرح عواطفه، وأن يحرص على اغتنام كل فرصة تتاح لكما للاستمتاع بالهواء الطلق والاستلقاء للاسترخاء، وتجنب أن يعطي فوق طاقته من جهد؛ لأن لكل إنسان طاقة محدودة وإلا وقع في فخ العصبية.. كما أن في سنة الرسول صلى الله عليه وسلم الكثير من الأحاديث التي توجّه للتخلّص من العصبية.
وربنا معاكِ.

لو عايز تفضفض لنا دوس هنا