لا تقولي (شخصيتي وحشة).. فأنت الأفضل

السلام عليكم.. لو سمحتم أنا نفسي حد يساعدني، أنا بنت عندي 18 سنة، وعلى طول حاسة إن شخصيتي وحشة أو أنا اللي باوصّل للناس كده؛ بس أنا والله مش وحشة؛ لكن دايماً بحب أعرّف اللي قدامي إن قلبي جامد وإني وحشة.
مش عارفة أنا ليه كده، حتى لما باتخانق مع صاحبتي اللي هي زي أختي وأكتر، أول حاجة بتيجي على لساني: أنا مش عايزة أعرفك تاني؛ بس بارجع بعد يومين، وأقول أنا ليه عملت كده وإزاي أقول كده لصاحبتي وبارجع أصالحها.
وكمان هي مرتبطة بواحد صاحبي أوي وإحنا أصحاب من زمان.. حصلت مشكلة معاه واتضايقت منه، رُحت قلت لها تقول له إني مش عايزة أتكلم معاه تاني وهو زعل، ودلوقتي مش عايز يكلّمني.
بس أنا والله غصب عني، قلبي بيأسي أوي، وبانسى أي حد في لحظة؛ حتى لو كان مين، وفي الآخر لما أهدى أرجع أقول إيه اللي أنا باعمله ده.
أنا كل شوية باخسر حد، وكل ما أقول مش هاعمل كده تاني برضه أول ما تحصل حاجة باتعصّب وأقول كده للي قدامي، ودايماً باقعد أعيّط على أي حاجة وعلى طول زعلانة لو رحت في حتة مثلاً وما كانش فيه حد مهتم بوجودي باتضايق وباخد جنب وباقعد أعيّط.
حتى لما باطلع رحلة مع أصحابي وأشوفهم بيهزروا مع زمايلنا، وما حدش بيهزر معايا أو بيكلمني بازعل وباتضايق واقعد أعيط، ما بافكّرش حتى أدخل معاهم في الكلام وأشاركهم في الهزار والضحك.
أنا ليه كده؟ أنا حاسة إني مريضة مع إني والله مش وحشة وباحس إني طيّبة جداً وجدعة وبحب كل الناس وعمري ما كرهت حد.
أعمل إيه نفسي حد يساعدني بجد.
jas




صديقتي الجميلة.. أنت في مرحلة انتقالية من عمرك دلوقتي.. وبُكرة هتبصّي على المرحلة دي وتفتكري وتضحكي وتقولي: ياه أنا إزاي كنت حساسة كده.
إنتِ في المرحلة دي بتقرّبي من النضج الجسمي والعقلي والنفسي والاجتماعي"؛ ولكن مش النضج نفسه؛ وبتبدأ المرحلة دي بالنضج العقلي والجسمي والنفسي والاجتماعي؛ ولكنها لا تصل إلى اكتمال النضج إلا بعد عدة سنوات قد تصل إلى 10 سنوات.
أنا باحاول أفهّمك المرحلة اللي إنتِ فيها عشان تفهمي نفسك أكتر، ولما الإنسان يبدأ يفهم نفسه، يبدأ يعرف يتحكم في نفسه وفي تصرفاته، ومن سمات هذه المرحلة ما تسميه إنتِ قسوة، وهي في الحقيقة سمة من سمات هذه المرحلة، وهي "العصبية وحِدّة الطباع"؛ فأنت تتصرفين من خلال عصبيتك وعنادك، وتريدين أن تتحقق مطالبك بالقوة والضغط، وقد تكونين أحياناً متوتّرة بشكل يسبب إزعاجاً كبيراً للمحيطين بك، فتبكين بدون أسباب منطقية أو تزعلي بشدة وتتضايقي من شخص معين.
ولازم تعرفي إن الدراسات العلمية بتقول إن فيه علاقة قوية بين وظيفة الهرمونات الجنسية والتفاعل العاطفي؛ بمعنى إن المستويات الهرمونية المرتفعة خلال هذه المرحلة دايماً بتؤدي إلى تفاعلات مزاجية كبيرة على شكل غضب وإثارة وحِدّة طبع عند الذكور، وغضب واكتئاب عند الإناث، وستجدين لديك أيضاً الاندفاع، ومحاولة إثبات الذات.. وعاوزة أطمّنك إن كل ده طبيعي جداً، وما فيش فيه أي مشكلة، وكمان له حلول سهلة، ومنها:
إنك تبدئي في التعبير عن أفكارك الشخصية، يعني لما تكوني عصبية أو حزينة جرّبي تكتبي حدوتة طلّعي فيها كل اللي جوّاكِ أو ارسمي حتى لو كانت شخبطة، المهم تخرّجي الطاقة اللي جوّاكِ دي.
وجرّبي كمان تقرئي أكتر، وخصوصاً عن المرحلة العمرية اللي إنتِ فيها، عشان تفهمي نفسيتك ونفسية أصحابك كمان، وتعرفي إنتِ بتتصرفي كده ليه، وهم كمان بيتصرفوا معاكِ كده ليه.
كمان حاولي تلتزمي بالفروض الدينية، حاولي تصلّي واتكلمي مع ربنا كتير وادعي.
كمان حاولي تقرّبي من مامتك كصديقة، لأن هي دي اللي مهما زعلتوا من بعض مستحيل تفترقوا.
وطبيعي إنك تحسّي بإنك عاوزة تلفتي الانتباه أو تحسّي بأهميتك.. دي بقى ما لهاش علاقة بالمرحلة؛ لأن دي رغبة كل إنسان إنه يكون محطّ الأنظار والاهتمام؛ وإلا ليه كل شركات الموضة والعطور والاكسسوارات؟ وكل كورسات التنمية البشرية اللي بتعلّم الإنسان يقدّم نفسه بشكل كويس ويجذب الناس؟ لأن الحاجات دي جزء منها موهبة وجزء مكتسب لازم الإنسان يتعلمه.
إنتِ مش وحشة وأنا واثقة بعد ما قريت كلامك قد إيه إنتِ طيّبة فعلاً وجدعة وبتحبي الناس؛ بس ناقصك إنك تحبّي نفسك.
محمد على كلاي الملاكم الأشهر في العالم بيقول "أنا الأفضل، كنت أقولها حتى قبل أن أعلم أني كذلك".. صديقتي أنت الأفضل؛ فعاملي نفسك كملكة، وسيعاملك من حولك كملكة، وملكة هنا لا تعني الغرور، لا تعني أن تكوني أفضل من الآخرين؛ ولكن أن تشعري بقيمة ذاتك وتقدّريها ولا تشعري أبداً أنك "وحشة" لأنك بمجرد ما هتحسّي كده هتوصّلي للناس كده.
كل ما تمرّين به طبيعي، وسيأخذ وقته ويمرّ، ومعرفتك به وقراءتك عنه سيساعدك كثيراً على أن تتحكمي فيه.
تحياتي

لو عايز تفضفض لنا دووس هنا