حاولي أن تتغلبي على هذه الصدمة

أنا دايما بحب أفضفض معاكم لأني باثق في رأيكم جدا، ومشكلتي ممكن تافهة؛ بس مش عارفة اتصرف فيها إزاي أنا بحب واحد ومفروض إنه بيحبني.
الأول كنت متأكدة من حبه ليّ، كان بيحاول يرضيني بأي شكل، ولما كنت بازعل مش كان بيبطل اتصال ورسايل، من فترة عرف بنت، ووعدني إنه يتغير، ورجعنا زي الأول وأحسن، بعد كده حسيت إنه يعرف بنات، وقلت له حاسة إننا هنبعد عن بعض قريب لأنك تعرف بنات قال لي: لا مش باعرف.
كانت أول مرة أشوفه بره الكلية؛ بس ما كنتش مستريحة؛ حتى صحابي كانوا معايا، وقالوا لي إنهم أول ما شافوه مش استريحوا له؛ غير إنه كل مرة كان باين عليه إنه بيحبني؛ أما المرة دي لأ، وكنت طول الوقت ساكتة وفي بالي هو هيسبني إمتى.
المهم بعديها بيومين قلت له أنا حاسة إنك تعرف بنات، اتصل قال لي روّقي أنا ما اعرفش حد والله، بعت له رسالة قلت له لو بتحبني وعايزني اثبت لي إنك ما تعرفش بنات، رد في رسالة بعد 8 ساعات قال لي حبيبتي والله ما اعرف، بعدين عايزاني أثبت لك إزاي يعني.
ومن وقتها مش اتصل وأنا مسافرة، ومش عارفة أعمل إيه، وهو متغير معايا أوي، ما كانش بيستحمل إني أزعل دلوقتي مطنشني.
كل صحابي قالوا لي ده بيلعب، وإنت تستاهلي أحسن منه، بس مش معقول بعد كل ده كان بيلعب بيّ، أنا كنت متأكدة إنه بيحبني؛ بس دلوقتي لا مش عارفة إيه اللي غيّره وآخر مرة طول ما هو قاعد معايا يقول لي خسي شوية، صوتك في التليفون غير الحقيقة، وبيرخم وبس، وأنا بحبه مش عارفة أبعد وأنسى، ولا أعمل إيه؟ آسفة جدا إني طوّلت عليكم وأرجو الرد.
ن.م

لو عايز تفضفض لنا دوووس هنا