ابقي كما أنتِ!

محتاجة رأيكم جداً أرجوكم.. أنا عندي 22 سنة حبيت شاباً وارتبطنا من أربع سنين وداخلين في خامس سنة، وهو في نفس سني لسه مخلص دراسة السنة اللي فاتت، كان دايماً بتحصل بنا مشاكل وبنرجع تاني، وكان في كل مرة بيبقى عاوزني أشوف حياتي من غيره علشان ما يظلمنيش معاه؛ لأنه لسه ما كوّنش نفسه وفي بداية الطريق وإنه آه بيحبني وعاوزني بس لو قال استنيني هيبقى بيظلمني.
انفصلنا ورغم الانفصال كنا بنكلم بعض كل فترة مش كبيرة نطمّن فيها على بعض، قرر إنه يسافر يشتغل وهيقعد سنتين على الأقل، وقبل ما يسافر كلمني وقال لي: إنه بيحبني جداً وعمره ما حب حد غيري، وإن كل اللي بيتمناه يشوفني مبسوطة وما يبقاش ظلمني بإنه يضيّع عليّ أي فرصة ممكن تيجي لي لو قال لي استنيني، وهو مش عارف اللي جاي هيبقى إيه. سألته لما كلمني قلت له: إنت عاوز لما ترجع تلاقيني لسه زي ما أنا ولا عاوز ترجع تلاقيني ارتبطت بغيرك؟؟!! قال لي الإجابة اللي عندي لو قلتها يبقى أنا ما بحبش غير نفسي وأنا مش عاوز أظلمك أنتِ بالذات معايا.. قلت له إن أي إجابة هيقول لها مش هتزعلني ولا هتغيّر كتير بس أنا عاوزة إجابة وبس؟؟ راح قال لي نفسي أرجع ألاقيكِ لسه زي ما أنتِ ومش مرتبطة.. بس ما ردتش عليه بأكتر من إني قلت له خد بالك من نفسك، وابقى طمني عليك.


أنا دلوقتي ما بحبش حد غيره ولا عمري تخيلت الحياة من غيره، بس خايفة أستناه ما يرجعليش وفي نفس الوقت مش قادرة أتخيل حياتي من غيره مش عارفة كلامه ده علشان بيحبني فعلاً وخايف يظلمني ولّا بيهرب.. أرجوكم تساعدوني..

A..