حيرانة

السلام عليكم أنا عندي 20 سنة في كلية من كليات القمة متفوقة والحمد لله في دراستي. المشكلة إني اتخطبت لواحد جارنا هو كويس والله وبيشتغل شغلانة كويسة، بس المشكلة فيّ أنا أوقات باكون مبسوطة أوي وأقول الحمد لله إن ربنا رزقني بيه وأوقات تانية ببقى مش عارفة مالي أقعد أقول لنفسي أنا إيه اللي عملته في نفسي ده أنا لسه صغيرة على الموضوع ده، أنا لسه عايزة أشتغل وأثبت نفسي إحنا المفروض حنتجوز بعد ما أخلص الكلية على طول.

أنا باقول لنفسي إن كل دي وساوس من الشيطان وأقعد أستغفر ربنا وأصلي صلاة الاستخارة بلاقي نفسي هديت شوية وأوقات تانية بحس إني شايلة هم الدنيا كله على كتفي، واللي بيزود أكتر في شكي ده هما أصحابي دايما لما باكون معاهم يقعدوا يقولوا خطوبة إيه دلوقتي وجواز إيه لسه بدري على الكلام ده لما نشتغل ونثبت نفسنا، كلامهم بيقلقني أكتر بقعد أقول لنفسي يا ترى اللي عملته ده صح ولا غلط، وفي نفس الوقت بافكر فيه ألاقي إنه ما عملش حاجة تضايقني بالعكس مواصفاته بنات كتير في سني تتمناها؛ لأنه وسيم وبيشتغل في شركة كبيرة وحنين وطيب أوي معايا بجد أنا محتارة أعمل إيه أوقات باقول لنفسي فيها إيه لو جمعت بين شغلي وفي نفس الوقت أكون متزوجة، وأوقات تانية باقول أنا لسه صغيرة على كل ده أرجوكم ردوا عليّ.
I