(افتح قلبك مع د. هبة يس).... مش عارفه أحبه

أرسلت (م. م) إلى افتح قلبك تقول:
أنا فتاة عمرى 20 سنة، لسه فى الكلية، اتخطبت من فترة، خطوبة تقليدية جدا، ماما قالت لى إن فى عريس كويس ومواصفاته ممتازة، وافقت إنى أشوفه وأقابله، واتضح لى إنه هو كمان مكنش يعرفنى، وإن أهله هما اللى رشحونى له، فوافق لأنه شخص مطيع جدا لأهله، بالإضافة إنه بيشتغل بره ومعندوش وقت يدور ويشوف بنات بنفسه.
اتخطبنا وكنت سعيدة فعلا فى الأول، لغاية ما سافر، حزنت جدا، وحسيت إن العلاقة دى ناقصة لأنه مش موجود، هو بيكلمنى كتير، وبيبعت لى رسايل حب وكلام حلو، لكن أنا مش بقدر أرد عليه، لأنى مش حاسه بيه ولا بالكلام اللى بيقوله، فبالتالى قلبى مش جايبنى إنى أبادله نفس الكلام، وباضطر اتحجج بأى حاجة، زى إنى عندى مذاكرة وامتحانات ومشغولة، وده طبعا بيزعله منى.
هو فعلا إنسان كويس ومحترم، ومتدين جدا، ومن يوم ما اتخطبنا وهو بيقول لى إنى أول وآخر حب فى حياته، وأنا مصدقاه، لكن المشكلة فيا أنا، أنا اللى مش عارفة أتجاوب معاه، مش قادرة أضحك عليه وعلى نفسى وأقوله بحبك.
كل ما أقول كده لحد يقول لى إنه خسارة فيا، وإنه أحسن منى، وإنى مش وش نعمة، محدش فاهمنى، أنا خايفة أكمل فأظلم نفسى وأظلمه معايا، انتى رأيك إيه يا دكتورة ؟
وإلى (م) أقول:
شوفى يا جميلة سواء الناس ارتبطت عن حب أو لأ فمش هو ده اللى بيعمر الجوازة، اللى بيخلى الناس مرتاحة ومبسوطة فى جوازها بجد هو مدى التوافق والاتفاق بين الطرفين، يعنى أنا عايزاكى تفكرى بينك وبين نفسك كده، وياريت تكتبى أفكارك فى ورقة، وتشوفى إيه هى مواصفات الشخص اللى كان نفسك تتجوزيه؟، من أول المواصفات الشكلية، إلى مواصفاته الشخصية، إلى مواصفاته المهنية والمادية، إلى مواصفاته الاجتماعية، إلى مستوى التدين المطلوب، كان نفسك فى حد جد ولا بيحب الهزار؟، واحد (بيتوتى) ولا بيحب الخروج ؟، واحد ديمقراطى وبياخد رأيك ولا سى السيد و ديكتاتور؟، اكتبى كل ده، وشوفى لو خطيبك فيه أغلب المواصفات دى ولا لأ، وخلى بالك بأقول أغلبها مش كلها، لأنه لو لاقيتى شخص فيه (70-80 %) من مواصفاتك الشخصية يبقى رائع وفعلا مفيش أكتر من كده.
الحاجه التانية اللى عايزاكى تفكرى فيها هى، هل فى بينكم اهتمامات مشتركة؟، يعنى مثلا هو بيحب حاجه انتى بتحبيها؟، هو بيحب نشاط انتى بتقومى بيه؟، انتى بتحبى حاجة من اللى هو بيحبها؟، قراءة، رياضة، هواية، خروج، إن شالله حتى لعب البلاى ستشين، هل فى بينكم اهتمامات مشتركة تجمعكم فى المستقبل وتقدروا من خلالها تقضوا مع بعض وقت جميل يجمعكم؟، لو فى يبقى عز الطلب، لأن أكتر الجوازات الناجحة بيكون فيها الزوجين زى الأصحاب، يعنى بيقدروا ينبسطوا مع بعض وكأنهم اتنين أصدقاء مش بس زوجين.
لو توفرت الحاجات دى فى خطيبك يبقى اوعى تفرطى فيه، لأنه هدية من السما فعلا، والحاجات اللى فيه دى هى اللى هاتحببك فيه وفى عشرته فى المستقبل، خاصة بعد ما عامل البعد يختفى وتكونوا مع بعض بعد كده.
لكن لو هو مافيهوش أى حاجة من مواصفاتك الى انتى بتتمنيها (يعنى أقل من 20_30%) من المواصفات، ومفيش بينكم أى حاجات مشتركة، ولا تشابه أو تقارب فى التفكير، يبقى سيبيه طبعا، مش لأنك مش بس مش قادرة تحبيه دلوقتى، لأ عشان عمرك ما هاتحبيه بعد كده، بل بالعكس ممكن مشاكل ومتاعب الحياه تبعد بينكم أكتر.
أنا عارفة انتى بتتكلمى على إيه، على إنك مفتقدة لأحاسيس الاشتياق له، والإحساس بأنه واحشك، والرغبة فى الكلام والتواجد معه، والسعادة والفرحة الغامرة لما يكلمك أو يبعتلك، والحاجات دى كلها انتى بتسمعى عنها من زمايلك اللى (بيحبوا)، أو بتشوفيها فى المسلسلات و الأغانى، مش كده؟، مش هاقدر أقول لك إن كل ده مش حقيقى، لأنه طبعا فى حب بجد، وفى ناس ربنا بيوفقها إلى (توأم الروح) بجد، لكن مش كل اللى انتى شايفاهم دول كده، بالعكس ده أغلبهم لا بيحبوا ولا يعرفوا يعنى إيه حب أصلا، فى منهم كتير أوى بيقضى وقت، وفى منهم اللى عايز يتقال عليه لافاف وداير وبيعرف بنات، وفى منهم اللى عايزه تسمع كلمتين حلوين من أى واحد والسلام، وهلم جر، وأكبر دليل على اللى بأقولهولك ده إن أغلب قصص الحب (الملتهبة) اللى انتى شايفاها دى لا تكلل بالجواز، وإن جزء كبير منها حتى وإن أدى إلى جواز بينتهى الى الطلاق سريعا....
أنا مش عايزة أقولك إنه مفيش مشاعر حلوة أو أحاسيس حقيقية، لكن اللى عايزة أقولهولك إن الحاجات دى قدرية جدا، يعنى ممكن تحصل لناس ومتحصلش خالص لناس تانية، وفى كل الأحوال مش هى الأساس فى الحياة السعيدة، أو عشان أكون أدق، مش هى لوحدها اللى بتعمل حياة سعيدة، الأهم هو توفر (التوافق والعوامل المشتركة) بين الزوجين، لأن ده هايعمل راحة وألفة وإحساس حلو بين الاتنين، فحتى لو توفر الحب والإعجاب والعواطف المشتعلة _اللى انتى نفسك فيها_ مع عدم توافر التوافق مش هايكون فى لا راحة، ولا عشرة حلوة، ولا حياة من أساسه، وبالتالى حتى الحب نفسه هيختفى فى ظل الظروف دى.
وأخيرا أنا عارفه إن مش كل الناس زى بعضها، وإن فى ناس عاطفية ورومانسية، وناس تانية واقعية وعقلانية، فلو انتى كنتى من النوع الأول اللى بيشوف إن الحياة متمشيش إلا لو فيها (الحب اللى تقصديه) يبقى مفيش قدامك غير إنك تفكى ارتباطك بخطيبك ده، وتنتظرى أن تأتى لك الأيام بما تريدين، والذى قد يأتى وقد لا يأتى أبدا، أنا مش بخوفك أو بيأسك، لكن مفيش حد فى الدنيا دى بيعيش بمشاعره بس، لازم فى الأول وفى الآخر يحكم عقله مع قلبه.... فهمتينى؟.
للتواصل مع د. هبة وافتح قلبك:
[email protected]