قبل قراءة هذا الجزء عليك قراءة الجزء الأول: "ماذا لو غنت أم كلثوم بوس الواوا (1)" إن لم تكن قد قرأته. تصفيق حاد دوى في الأستوديو، عند بداية حلقة جديدة من حلقات برنامج "هالة شو" على قناة "روتانا"، وما إن فرغ الموديلز الحاضرون في الأستديو من التصفيق، حتى التفتت "هالة سرحان" إلى موسيقار الأجيال "محمد عبد الوهاب" والفنانة "دلال عبد العزيز" وقالت بطريقتها المعهودة التي تضع فاصلا زمنيا طويلا بين كل كلمة وما بعدها: منذ فجر التاريخ.. ونحن نعاني.. من.. ظاهرة.. فتيات الليل.. وهي الظاهرة.. التي.. ناقشتها السينما المصرية.. في.. العديد.. من الأفلام.. وفي حلقة اليوم.. نناقش.. ظاهرة فتيات الليل مع نماذج حقيقية.. أخذناها إليكم خصيصاً من شوارع الهرم وجامعة الدول العربية وأمام مول "سيتي ستارز".. ومعنا موسيقار الأجيال "محمد عبد الوهاب"، ومعنا أيضاً الفنانة الكبيرة.. "دلال عبد العزيز" وعدد من النقاد.. اسم الله عليّ وعلى اللي حواليا.. صفقوا بقى يا جماعة. وقبل أن تكتمل حروف كلماتها الأخيرة دوى تصفيق حاد في الأستوديو، لتبدأ حلقة "فتيات الليل" وترتسم على شفتي "أم كلثوم" ابتسامة ساخرة وهي تتابع الحلقة في منزلها، وقد أخذت ابتسامتها تتسع.. وتتسع.. وتتسع. *** اقتحمت خادمة "أم كلثوم" الفلبينية مدخل جريدة "الأهرام"، وما إن اعترض طريقها رجال الأمن متسائلين عن هويتها، ومن الشخص الذى تقصده حتى صاحت بأعلى صوت: أنا انضحك عليّ وعايزة حد ينقذني من المصيبة اللي أنا فيها.. هاتوا لي رئيس تحرير "الأهرام" أو رئيس قسم الحوادث بسرعة. وظل رجال الأمن ينظرون إليها بدهشة.. وحيرة.. وغموض.. وارتباك.. *** أخذت "أم كلثوم" تقهقه بشدة وهي تقرأ مانشيتات الصحف الصباحية وقد جاء فيها: اتهامات ضد هالة سرحان بفبركة حلقة "بنات الليل" في مصر وتساؤلات عن دور عبد الوهاب في ذلك هل كتبت حلقة "فتيات الليل" الفصل الأخير في حياة أشهر إعلامية مصرية؟ نص تحقيقات النيابة مع الثلاث فتيات اللاتي تورطن في الحلقة لسماع أقوالهن والنائب العام يستدعي هالة سرحان وعبد الوهاب أسرار وحكايات نسوان هالة سرحان!! هروب هالة سرحان إلى لبنان في ظروف غامضة واختفاء عبد الوهاب في بيته وما إن فرغت من القراءة، حتى وجّهت الريموت الكنترول على قناة "المحور" لتشاهد برنامج "90 دقيقة"، ليظهر الإعلامي "معتز الدمرداش" وهو يقول بحماس: طبعاً إحنا هنا مش بصدد التشهير بالإعلامية "هالة سرحان" ولا القناة الفضائية اللي بتعمل فيها، لكن خلونا نقول أننا بنناقش قضية في منتهى الأهمية.. مصداقية الإعلام العربي.. نعرف منين يا جماعة إن البرنامج اللي بنتفرج عليه حقيقي.. وإن الناس اللي جايبينهم عشان يحكوا مشاكلهم وقصصهم مش قابضين فلوس عشان يمثلوا علينا.. قضية في منتهى الخطورة لدرجة إن جه علينا اليوم اللي شفنا فيه فتيات ليل كده وكده.. انضحك عليهم بشوية فلوس على كام قطعة بيتزا عشان يسيئوا لسمعة مصر في الفضائيات والناس تطلع تقول مصر فيها بنات ليل، وبالمناسبة دي معانا اتصال تليفوني من كوكب الشرق أم كلثوم.. آلو أم كلثوم: هاي يا معتز ازيك؟ معتز الدمرداش: بخير الحمد لله يا ست الكل.. احكي لنا عن اللي حصل بالتفصيل خصوصاً إن ليكِ علاقة وطيدة بالموضوع. أم كلثوم: إلا وطيدة.. دي وطيدة وواطية يا جدع.. تخيل يا ميزو؟! البنت الشغالة الفلبينية بتاعتي بعد ما يا عيني قبضوا عليها ظلم وجبت لها واسطة كبيرة من أمين شرطة معرفة عشان تطلع.. اصطادها معدّ برنامج "هالة شو" وهي بتجيب لي الخضار من السوق، وأقنعها بصنعة لطافة إنهم يستضيفوها في البرنامج عشان تقعد تصفق مع الجمهور، وآهو فرصة تغير جو بعد اللي شافته في السجن، وتشرب لها كام علبة عصير حاجة ببلاش كده.. لكن هناك.. قال إيه فوجئت ب"هالة سرحان" جاية تاخدها على انفراد في أوضة ضلمة.. وقعدت تعيط وتقول لها: "كنا متفقين مع شوية بنات لا مؤاخذة ييجوا يتكلموا في موضوع لا مؤاخذة، لكن البنات طلعت لا مؤاخذة وضربوا المعاد ولحسوا كلمتهم.. عشان كده لا مؤاخذة الحلقة هتنضرب ومش هاقبض حقها ومحتاجة إنك تقفي معايا لا مؤاخذة، وتطلعي كإنك لا مؤاخذة كده وكده يعني.. وحياة ابني محمد ماحدش هيشوفك ولا هيعرف شكلك لا مؤاخذة، وهاديكي فطيرة بيتزا سوبر سوبريم لا مؤاخذة، وهاظبطك بشوية قرشينات حلوين".. البت يا عيني كانت غلبانة ومش فاهمة حاجة لأنها فلبينية ومنكسرة، فوافقت، لكن بعد الحلقة أهلها الفلبينيين اللي في الصعيد عرفوا شخصيتها، وحلفوا ليدبحوها، عشان كده أنا اللي قلت لها تروح للنائب العام تبلغ على "هالة سرحان"، وكمان راحت جورنال "الأهرام" عشان ينشروا شكوتها، وأنتم بقى البركة فيكم فجرتم القضية لا مؤاخذة. معتز الدمرداش: "أم كلثوم" في الحقيقة أنا كان لي سؤال اسمحي لي أسأله رغم حساسيته.. موسيقار الأجيال "محمد عبد الوهاب" كان مشترك في الحلقة دي.. تفتكري تفسير ده إيه؟ أم كلثوم (ضاحكة): هاهاهاها.. يوه جاتك إيه يا معتز.. بقى معقول عايزني أقول إن "محمد عبد الوهاب" شارك في تشويه سمعة مصر من خلال الفضائيات؟ وإنه قام بتسهيل الفبركة واشتغالة الشعب المصري؟ عيب يا ميزو.. أنا مش ممكن أقول الكلام ده أبداً على زميل لي في الوسط الغنائي.. خصوصاً إن شهادتي هتبقى مجروحة بسبب إنه نازل ضدي في انتخابات نقابة المهن الموسيقية.. لكن عموما الشعب بنفسه شاف وعرف، واللي ما يشترى يتفرج ع ال"youtube"، نياهاهاهاهاهاها معتز الدمرداش (ضاحكاً): ع ال"youtube" لا مؤاخذة برضه؟ أم كلثوم (ضاحكة): أيوه لا مؤاخذة.. نياهاهاها معتز الدمرداش: أم كلثوم.. بنشكرك على مداخلتك التليفونية لا مؤاخذة، والحكم في النهاية للسادة المشاهدين. وما إن أنهت "أم كلثوم" مداخلتها التليفونية مع "معتز الدمرداش"، حتى عادت تقرأ مانشيتات الصحف في شماتة، حتى دخلت عليها خادمتها الفلبينية وقالت ضاحكة بلكنتها العربية المكسرة: أي خودعة يا ستّ.. لقد خدعناهم جميعاً وانطلت عليهم الخودعة! التقطت "أم كلثوم" حبة "كيوي" وألقتها للخادمة وهي تقول ضاحكة: المفروض تشكري سيدك "عبد الحليم حافظ".. هو صاحب الخطة الجهنمية اللي أقنعتني آجي أضمنك بنفسي في النيابة وأفهمهم إنك مش ضد التوريث.. لولاه كنت افتكرتك جاسوسة ل"منيرة المهدية" وسبتهم يعملوا معاكي الصح. قالت لها الخادمة ضاحكة في بلاهة: نعم يا سيدتي.. كنتِ تظنين أنني جاسوسة جاموسة.. هاهاها بادلتها "أم كلثوم" الضحكة، قبل أن يرن هاتفها المحمول وتقرأ على شاشته: "لديك مكالمة فيديو من نجم الجيل"، فالتقطت الهاتف وضغطت زر الإجابة قائلة في مرح: "عب حليم" حبيبى.. عامل إيه يا عوبد؟ جاءها صوت "عبد الحليم حافظ" قائلاً في حميمية وقد ارتسمت على وجهه ابتسامة عريضة: إيه يا ثومة يا جامدة جدا.. شفتي الخطة بتاعتي ظبطت الظبابيط إزاي؟ انطلقت ضحكة "أم كلثوم" مجلجلة وهي تقول: يخرب عقلك يا عبده.. ده أنت فظيع فوق المريع.. كلامك كله اتحقق ومفيش ولا كلمة نزلت الأرض.. أنا رحت ضمنت البت من هنا وأنت قلت لمعدّ البرنامج عندي فكرة حلقة جامدة ليكم وهتعمل ضجة، وطلعتها في دماغه، وبعدين زقينا عليه البت الفلبينية، وبعد الحلقة خليناها راحت عملت بلاغ وفضلنا إحنا بعيد عن الصورة.. كده أنا ضربت عصفورين بحجر.. "عب وهاب" خسر مصداقيته وحب الناس ليه.. و"هالة سرحان" مش هيكون ليها عين تسانده تاني وتشجع برنامجه الانتخابي. غمز "عبد الحليم" بعينه وقال بشقاوة: أي خدمة يا "ثومة" وماتنسيش كمان إني علمتك كل متطلبات العصر اللي فاتتك وإنتِ نايمة النومة الطويلة اللي نمتيها.. ضحكت "أم كلثوم" وهي تقول: بس يا واد ما تفكرنيش.. ده أنا نمت نومة أهل الكهف.. قال وأنا كنت فاكرة إن ال"LCD" جهاز تجسس.. مش عارفة أنا كنت عايشة إزاي من غير "Account" ع الفيس بوك.. في حين إن البت "منيرة المهدية" عاملة جروب اسمه "وأنا مالي يابا هئ" وحاطة فيه صور كليبها الأخير "ليه بيداري كده"، مع إنها مش مدارية أي حاجة خالص.. الإنصاص قامت والقوالب نامت يا ولاد. ضحك "عبد الحليم" وهو يشد قامته ويقول بثقة: ولا يهمك يا "ثومثومتي".. طول ما أنا معاكي مش عايزك تحملي هم أي حاجة خالص. ضاقت عين "أم كلثوم" وهي تحك ذقنها بإبهامها وسبابتها قائلة في تساؤل: إنما بتعمل معايا كل ده ليه يا "حلومة"؟ تلعثم "عبد الحليم" وهو يقول مشدوهاً: آآآآآآ.. خيرك علينا كلنا يا "ثومة" ونفسنا.. قاطعته في ضجر وهي تقول في ضيق: لخّص وهات م الآخر! أخرج "عبد الحليم" ورقة مناديل بريحة واخدها مع وجبة "كنتاكي"، وأخذ ينشف العرق الذي تصبب على وجهه، ثم قال في توتر: أنا كمان مزنوق ومحتاج لك يا "أم كلثوم".. الضرب زاد قوي تحت الحزام، ومابقيتش عارف ألاحقها منين ولا منين.. "فريد الأطرش" بقى يتنطط عليّ، وعمل لعبة من تحت لتحت أقنع بيها "روتانا" إنها ما تتعاقدش معايا وتتعاقد معاه بدل مني، ده غير إنه طير مني الميوزك آوورد على ألبومى الأخير، وخدها هو.. حتى الجمهور بقى يهاجمني وعمل ضدي أكتر من "جروب" ع الفيس بوك.. ازداد تصبب العرق على وجه "عبد الحليم" حتى أن خصلات شعره الإسبايكي انهارت وسقطت من وقفتها، وأصبح شعره فيرساتشي وهو يقول بحزن: حتى المطرب الشعبي "محمد رشدى" يا "ثومة".. عمل تحالف مع "الأبنودي" و"بليغ حمدي" ونزل ألبوم "العبد والشيطان" اللي كسر الدنيا وعمل أعلى نسبة مبيعات.. ده غير أغنيته اللي بيقول فيها: "أنا شارب سيجارة بني.. حاسس إن دماغى بتاكلنى" وفي آخر الأغنية بيغيظني يا "ثومة" ويقول: "يا عم ولع.. يا سيدى ولع.. كوكا كوكا كوكا".. وبقوا يطلبوه يغني في الأفلام أكتر مني، وجابوه يغني في فيلم "الفرح" مع "خالد الصاوي" و"جومانا مراد" تخيلى؟ هزت "أم كلثوم" رأسها في أسى وتعاطف وهي تشاهد الدمعة الساخنة التي سقطت على خد "عبد الحليم" وهي تقول: بس يا "عبد الحليم" قطعت قلبي.. بس برضه هارجع وأقول لك أنت اللي عملت كده في نفسك.. حد يغني ويقول: "خليها تاكلك" برضه يا "عب حليم"؟ ازدرد "عبد الحليم" لعابه وقال في ضيق: دي ألفاظ الشارع يا "ثومة"، ثم أنا قلت "دماغك" مش حاجة تانية.. الناس هي اللي نيتها وحشة.. عشان كده أنا هارد عليهم بجزء تاني اسمه "وش رجلي غضبان عليكم.. روحوا حسبنا الله ونعم الوكيل فيكم". ثم شد "عبد الحليم" قامته، وقال في صرامة: وبعدين سيبك من كل ده وانتبهي لنقطة مهمة جداً يا "ثومة".. "فريد الأطرش" في صف "عب وهاب".. ولو ما ساعدتنيش ووقفتي جنبي ممكن في أي لحظة تخسري الانتخابات. ارتسم الانتباه الممزوج بالضيق على وجه "أم كلثوم" وهي تقول: عندك حق يا "حلومة".. ركز معايا في اللي هاقولهولك دلوقتي علشان دي مسألة حياة أو موت.. أنا هاساعدك بشرط إنك تديني "كوميشن" من إعلاناتك الأخيرة اللي عملتها ل"بيبسي" مكان "فريد الأطرش". فهز "عبد الحليم" رأسه بالموافقة، وما أن أصغى الانتباه، وقبل أن تتفوه "ثومة" بكلمة واحدة، حتى انقطع الاتصال فجأة، وسمع "عبد الحليم" رسالة تقول: "عفواً.. لقد نفد رصيدكم.. يرجى إعادة شحن البطاقة".. وفي وقت واحد، ظلت "أم كلثوم" ومعها "عبد الحليم" ينفخان.. ويشخطان.. وينفران.. ويقفزان.. انتهى الجزء الثاني بحمد الله ويليه الجزء السابع عشر بإذن الله* (ده الجديد بقى) فانتظرونا
