السلام عليكم ورحمة الله وبركاته.. أنا خاطب بقالي سنة تقريباً، كنا قمة الحب والعطف والحنان، وعايشين أحلى أيامنا، وبنحب نشوف بعض كل يوم، ماكانش فيه يوم بيعدي إلا لما بنشوف بعض. لحد ما ابتدت مشاكل صغيرة بينّا؛ كنت أنا السبب فيها في بعض الأحيان، وهي فهمتني إني غلطان لأننا بكده هنضيّع حبنا، وأنا حاولت إني أغيّر من نفسي؛ لكن كنت باكرّر الغلط؛ بس كنت بارجع أصالحها؛ لأني باقي عليها وبحبها. صحيح كان فيه منها حاجات مش بحبها؛ بس لما كنت بانصحها كنت باتعصب أوي، وبادخل شمال.. أنا عارف إنه غلط؛ بس أنا ماليش تجارب قبل كده في الحب والخطوبة؛ بمعنى إن تعاملي كان كله مع أصحابي. عموماً السبب الأخير لخلافنا كان هايف أوي، ومش أقصده، وهي ماعادتش حاسة مني بحاجة، وبتقول لي: سيبنا لما ربنا ينظر في أمرنا، وطبعاً أنا رافض ده علشان لو سيبتها أنا عارف إنها هتنساني؛ برغم إني متأكد إنها بتحبني. star