افتحي شبابيك قلبك للنور والحب فخطيبك يستحق ما هو أفضل

أنا حابة أشكركم على الموقع الجميل ده، بجد أنا بحب أبدأ يومي بيكم وأشارك معاكم، مشكلتي نفسية ومادية مع بعض، أنا مخطوبة لابن خالي وهو بيحبني أوي، بس مش لاقية نفسي معاه ما أعرفش ليه، ممكن علشان هو كان متربّي في البلد وأنا في المدينة؟ احتمال.. بس هو قرّر يعيش هنا في القاهرة، وجاب شقة، بس المشكلة إمكانياته وحشة زي أي شاب بيكوّن نفسه، ووالده شايل إيده من الموضوع، بس الحقيقة والدي وقف معاه وسلّفه فلوس علشان الشقة وهو بيجتهد بس على قده.
المشكلة إني عايشة مع أبويا ووالدتي توفيت، وإخواتي الحمد لله كلهم متجوزين، وأنا اللي عايشة مع أبويا فحاسّة بوحدة، وحاسة إني على طول نفسيتي وحشة لأني اتعودت على الدوشة، وإحنا الحمد لله 5 إخوات، فلما تحسّ بإنك لوحدك بجد وحدة قاتلة، وخطيبي أنا اخترته بمزاجي يعني ما حدش فرضه عليّ، بس مش لاقية اندماج معاه، مش باشتاق له على طول، وممكن يكلّمني وما أردش واتلكك بكذا حاجة، على الرغم من إنه متعلّق بيّ، بس أنا شايفة الموضوع بتاعه بعيد.. إحنا آه مخطوبين، بس لسه قدامه كتير، لحد ما يجهز الشقة..
أفيدوني أسيبه ولا أكمل معاه؟ بس محتاجة أعيش وأحس إني في مملكتي زي إخواتي، وخايفة أكون ظلمته لو سبته، أنا مستريحة له بس مش بابقى مبسوطة معاه.. أرجو الرد.

h
لو عايز تفضفض لنا دوس هنا