عصير جوافة بالليمون الجوافة من الفاكهة اللي بتكون حلوة ولذيذة جداً لما بتتعمل عصير.. المقادير: * 1/4 كيلو جوافة * مية * سكر * عصير ليمونة * ورقة نعناع "للتزيين" الطريقة: هاتي الجوافة واغسليها وقطعيها قطع صغيرة، بس خدي بالك إنك تشيلي منها البذر، وبعد كده حطيها في الخلاط وضيفي إليها المية وعصير الليمون والسكر واضربيهم مع بعض كويس، وبعد كده صبيها في أكواب العصير.
*****************
سلطة خضراء سلطة خضراء المقادير: * حبة خس متوسطة * حبة طماطم * حبة خيار * حبة جزر * حبة فلفل أصفر * بصلة * زيت الزيتون * ملح * عصير ليمونة الطريقة: قطعي كل المقادير دي كلها مع بعضها واعصري عليهم الليمون وضيفي إليهم الملح وزيت الزيتون وحطيهم في طبق السلطة.. وبالهنا والشفا .
*****************
شوربة المأكولات البحرية بالليمون شوربة المأكولات البحرية بالليمون المقادير: * ربع كيلو سمك فيليه مقطع قطعاً صغيرة * ربع كيلو جمبري * ربع كيلو سبيط "اختياري" * كرات * كرفس * بصل * ثوم * عصير ليمون * ملح وفلفل أسود * قرنفل * حبهان الطريقة: 1- نظفي السمك والجمبري والسبيط كويس واغسليهم كويس، وبعد كده اسلقيهم في حلة عميقة مع الكرات والكرفس والبصل المقطع والحبهان والقرنفل. 2- خدي بالك وأنت بتسلقي السمك أنك تشيلي الريم أول بأول، وبعد كده ضيفي الملح والفلفل الأسود والثوم المفروم والبقدونس، وسيبيهم يغلوا على نار هادية لمدة نص ساعة. 3- بعد مرور نص ساعة صبي الشوربة في أطباق الشوربة، وللتجميل ممكن تضيفي البقدونس المفروم وترشي عليها عصير ليمون.. وبالهنا والشفا.
*****************
أرز صيادية مع سمك فيليه أرز صيادية مع سمك فيليه المقادير: * قطعة سمك فيليه * كوب أرز بسمتي * 2 بصلة مفرومة فرمًا ناعمًا * معلقة صغيرة كمون * 1/2 معلقة صغيرة قرفة * 2 كوب ماء * معلقة صغيرة ملح * 1/4 كوب صنوبر * زيت زيتون الطريقة: 1- نغسل السمك كويس، ونقطعه لقطع صغيرة، ونقليها في الزيت لغاية ما تستوي. 2- نجيب البصل ونشوّحه في كمية من الزيت لغاية ما لونه يبقى بني، وبعد كده نضيف عليه الماء والكمون والقرفة ونسيبهم يغلوا لمدة 10 دقائق. 3- بعد كده نضيف الأرز، ونسيبه يستوي على نار هادية لمدة ربع ساعة تقريبًا. 4- نجيب الصنوبر ونحمصه في الفرن. 5- هاتي طبق التقديم وحطي فيه الأرز وبعد كده غطّيه بالسمك وزيّنيه بالصنوبر.. وبالهنا والشفا.
*****************
كيكة التمر كيكة التمر المقادير: * كوب ونصف تمر منزوع النوى * 1/2 كوب زبدة * 1/2 كوب ماء * كوب ونصف لبن مركّز مُحلَّى "هتلاقيه في السوبر ماركت" * 2/3 كوب دقيق * 1/2 معلقة صغيرة كربونات الصودا * رشة ملح الطريقة: 1- سوّي التمر مع الزبدة والماء واللبن المركّز على نار هادية لغاية ما تحسي إن التمر بقى طري، وبعد كده سيبيه يبرد. 2- اخلطي الدقيق وكربونات الصودا والملح مع بعض، وبعد كده ضيفيه على خليط التمر، وقلّبيهم مع بعض كويس لغاية ما يمتزجوا تماماً. 3- صبي الخليط في صينية مدهونة بالزبدة وعليها طبقة من الدقيق، ودخّليها في فرن ساخن على درجة حرارة (160 درجة مئوية) وسيبيها لمدة 45 دقيقة أو لغاية ما تحسي إن الكيكة استوت. 4- سيبي الكيك لغاية ما يبرد، وبعد كده اقلبي الصينية في طبق التقديم.. وبالهنا والشفا.
***************** وبكده تكون خلصت عزومتنا النهارده، وياللا بسرعة على المطبخ علشان تلحقي تعمليها على الفطار، بس أوعي تنسي بعد الفطار تدخلي على قمر 14 علشان تبعتي وتقولي لنا على النتيجة... واستنينا بكرة في عزومة جديدة، ومن هنا لبكرة اوعي تنسي تبعتي رأيك وتعليقك.. كمان لو عندك أي استفسار أو لو عايزة تعرفي تعملي أكلة جديدة ومش عارفة تعمليها ابعتي وقولي لنا عليها واحنا هنقول لك على الطريقة على طوووول..
وإلى اللقاء غدا إن شاء الله مع أطيب التمنيات بصوم مقبول وإفطار شهي بإذن الله سلااااااااام ********************* للتعرف على مزيد من الوصفات الشهية اضغط هنا "سفرة دايمة" *********************