الولد والبنت وحب الإنترنت

أنا أول مرة أستخدم النت، كنت في سنة أولى كلية، ودلوقتي أنا في 3؛ بس لما دخلت النت وعرفت الشات والكلام ده، اتعرفت فيها على شاب أكبر مني بسنة؛ بس قدي في الدراسة؛ بس هو في بلد وأنا في بلد تانية. المهم اتكلمنا كتير على الشات، وبعدين طلب مني رقم تليفوني؛ بس أنا رفضت، وزعل، وقطعنا فترة، ورجعنا تاني؛ كل مرة يعمل كده لما يطلب فيها رقمي. المهم أنا قلت له: إديني رقمك وأنا هابقى أتصل بيك، واتصلت بيه مرة من رقمي وعرف إن ده رقم تليفوني.
المهم أنا ساعتها كنت واخدة الموضوع تجربة بس قطعت معاه حوالي سنة وكام شهر، ورجعت كلمته، وأنا في 3 كلية لأني كانت عندي مشاكل في البيت، وكنت محتاجة أكلم أي حد وارتاح معاه في الكلام، ويقول لي كلمة حلوة، وكلّمته واستغرب إني كلمته بعد المدة الطويلة دي، وسألني إيه السبب؟ وقلت له: إني كنت خايفة علشان أنا مش متعودة، وبقيت أكلمه في التليفون وعلى النت؛ بس المشكلة إني باعاتب نفسي علشان كلمته، وحاسة إني باغش بابا وماما؛ بس أنا بارتاح معاه أوي في الكلام؛ بس أنا مش بحبه.
كل الحكاية إني بحب أكلمه أوي. انصحوني. أنا ندمانة أوي، وفي نفس الوقت مش عايزة أقطع صلتي بيه، وكمان هو طلب يشوف صورتي؛ بس أنا باتهرب منه أرجو الرد.
L