فراخ بالكاري.. على طريقة "أسماء"

إزيكم يا أسرة "بص وطل" أنا النهارده حبيت أشارك معاكم بطريقة جديدة للأرز وهي الأرز بالفراخ والكاري وأنا باسمّيها أرز مكسيكان، أنا بحبها أوي ويا رب تعجبكم..
المقادير:
2 كوب أرز
1/2 كيلو شيش طاووك (وراك فراخ مقطّعة)
1/4 كيلو فلفل ألوان
بصلة كبيرة
مشروم (الكمية حسب الرغبة)
2 معلقة زيت
ملح وفلفل وكاري
زعتر
ليمونة
خل (بمقدار غطاء الزجاجة)
قرفة
2 معلقة صلصة
الطريقة:
1- أحضري طاسة كبيرة، وحطّي فيها معلقتين الزيت، وبعدين الفراخ المقطعة.
2- قلّبي الفراخ مع الزيت على النار، وبعدين حطّي التوابل (ملح وفلفل وكاري وزعتر وقرفة وممكن كمان تضيفي أي توابل تحبيها)، وبعد كده ضيفي الخل والليمون.
3- ممكن تزوّدي شوية مية لو احتجتِ علشان الفراخ تستوي، وبعد كده ذوّبي معلقتين الصلصة في شوية مية وضيفيها على الفراخ، وأول ما الفراخ تدخل في السوى ضيفي المشروم.
4- اعملي أرز أبيض بالطريقة العادية.
5- أحضري الفلفل وقطّعيه شرائح بالطول، وقطّعي البصل حلقات, وحطيهم في طاسة تانية ومعاهم شوية زيت، وشوّحيهم على النار لحد ما يدبلوا (لو عندك صويا صوص حطي معلقة كبيرة على حسب رغبتك).
6- بعد كده حطي الفلفل والبصل مع الفراخ، وقلّبيهم شوية مع بعض.
7- حطي الأرز في طبق التقديم، وعلى الوش الفراخ، وممكن تزيّني الطبق بأعواد البقدونس.. وبالهنا و الشفا.

ويا ريت تجرّبوها بجد.. وتبعتوا تقولوا لنا رأيكم إيه؟!!
وفي النهاية نحب نشكر صديقتنا العزيزة على وصفتها اللذيذة..
ونتمنّى إنك تجرّبيها.. وتبعتِ تقولي لنا على النتيجة..
وما تنسيش لو بتعرفي تعملي أكلة وشاطرة فيها جدًّا..
إنك تبعتيها لنا على صفحة..
"ورينا شطارتِك"
علشان ننشرها باسمك
مستيينكم،،،