"سجق بالخلطة" على طريقة "داليا"

إزيكم يا "بص وطل" والله بتوحشوني أوي، أنا النهارده جايبة لكم أكلة حلوة هي سهلة أوي..
أنا باعملها لما باحب آكل حاجة جديدة؛ بس مش عارفة هي إيه..
هي بصراحة من اختراعي أنا وبحبها جداً، يا رب تعجبكم..
المكونات
1/2 كيلو سجق أو سوسيس
ثمرة طماطم صغيرة
معلقة كبيرة طحينة
معلقة صغيرة زعتر
2 أو 3 فص ثوم
صلصة طماطم
ملح وفلفل
فلفل أخضر
بصلة
زيت
خل
الطريقة
1- أول حاجة قطّعي السجق حلقات زي اللي بتكون على البيتزا؛ بس ما تخليش سُمكها رفيع، يعني ممكن تقسّمي الواحدة على ثلاث أو أربع حلقات، وسيبيه على جنب شوية.
2- هاتي البصلة والثوم وافرميهم مع بعض كويس، وهاتي طاسة كبيرة وحطي كمية كبيرة شوية من الزيت، وحطي فيها الثوم والبصل ومعلقتين صلصة كبار، وقلبيهم مع بعض كويس، وسيبيهم على النار لمدة من 5 إلى 7 دقايق.
3- بعد كده قطّعي الطماطم لقطع صغيرة وضيفيها على الثوم والبصل والصلصة، وسيبيهم لمدة 5 دقايق كمان، وبعد كده لو حابة ممكن تقطّعي الفلفل وتضيفيه عليهم.
4- حطّي السجق مع الحاجات اللي فاتت وسيبيه لحد ما يستوي، وطبعاً ما تنسيش الملح والفلفل.
5- قبل ما تطفي على السجق حطّي معلقة الطحينة ومعلقة الخل، وفي الآخر رشّي عليه شوية زعتر واطفي على طول.
وبالهنا والشفا، وممكن تجرّبي الوصفة في كمية صغيرة الأول، وممكن تقللي المقادير حسب الكمية اللي عندك.. وميرسي كتير لبص وطل وكل أصدقائه اللي بحبهم.

في النهاية كل أسرة "قمر 14" بتشكر الأصدقاء اللي بعتوا لنا وصفاتهم الجامدة دي..
ويا ريت تجرّبوها فعلاً..
وفي انتظار آرائكم..
وكمان وصفاتكم الجامدة على لينك..
ورينا شطارتِك،،،