السلام عليكم أنا مشكلتي إني بحب واحد من 3 سنين أنا دلوقتي عندي 17سنة، وكمان ابن خالتي اتقدم ليّ ورفضته، وبعدين وافقت عليه ورفضته تاني من غير ما حد يعرف؛ حتى هو ما عرّفش أي حد إن أنا رفضته، وكمان إحنا دلوقتي مش بنكلم بعض خالص، ولما باكون موجودة مش بيكلمني ولا أكنه يعرفني. أنا كنت باحسب لما أرفضه ممكن علاقتنا ترجع زي الأول (ولاد خالة) زي ما أنا كنت عاوزة؛ بس لا، ما حصلش كده. وأنا دلوقتي مش عارفة أعمل إيه، كل صاحباتي بيقولوا لي ارجعي لابن خالتك هو الأولى بيك، وكمان هو اللي هيحافظ عليكِ؛ بس أنا بحب حبيبي، ومش قادرة أسيبه، وهو كمان ما يقدرش يبعد عني؛ هو بيقول لي كده دايماً؛ بس أنا دلوقتي مش عارفة أعمل إيه: هل أرجع لابن خالتي ولا أفضل مع حبيبى اللي فاضل لينا بالكتير سنة أو اتنين وييجي يتقدم ليّ رسمي. أنا بجد مخنوقة، ومش عارفة أعمل إيه، وحيرانة، ومش عارفة آخد قرار صح، أنا محتاجة بجد مساعدة، وحد يفيدني في مشكلتي، أنا عارفة إني طوّلت عليكم؛ بس أنا بجد مش عارفة أعمل إيه؟ يا ريت تردوا عليّ بسرعة عشان أنا محتارة أوي. marwa