فطيرة الزيتون والزعتر

أعدّها لكم: نيرة أحمد
النهارده هنعمل مع بعض فطيرة الزيتون والزعتر بطريقة سهلة وبسيطة، وممكن تقدميها فطار لأطفالك.
فطيرة الزيتون والزعتر
المقادير:
كوب دقيق أسمر
2 كوب دقيق أبيض
1⁄2 كوب زيتون مخلي مقطع شرائح
كوب طماطم مقطعة قطع صغيرة
ملعقة صغيرة خميرة فورية
ملعقة صغيرة عسل أبيض
1⁄2 كوب زيتون مفروم
ملعقة كبيرة زعتر
كوب لبن دافي
بيضة
ملح
الطريقة:
1- اخلطي الخميرة والعسل الأبيض واللبن والبيضة والدقيق الأسمر والأبيض والملح والزعتر والزيتون المفروم مع بعض كويس.
2- سيبي العجينة تتخمر لمدة ساعة، وبعد كده افرديها في صينية مدهونة بالزيت وضيفي عليها شرائح الزيتون والطماطم، وسيبيها تتخمر مرة تانية لمدة ساعة.
3- دخليها فرن درجة حرارتة 190 درجة مئوية لحد ما تستوي، وقدميها.. وبالهنا والشفا.

خلصت وصفتنا النهارده..
استنونا كل يوم مع وصفات جديدة..
سلام،،،