السلام عليكم.. أنا عندي 15 سنة، مشكلتي إني عندي أصحاب هما معايا من 8 سنين، ومش قادرة أغيّرهم علشان أرضي بابا وماما، وعلشان كمان بابا وماما يرضوا عني. المهم السنة دي أنا مابقتش معاهم في نفس الفصل، بس حسّيت إن اتنين منهم -وهما أعز اتنين- لقيتهم بيبعدوا حبّة حبّة، حاولت أواجههم، قالوا عادي، وحلفوا إن مافيش حاجة، وواحدة منهم قالت جملة ماعجبتنيش بس بعد كده اعتذرت، وقالت لي إنتي عارفة كويس غلاوتك عندي. المشكلة إني باتثبّت بسرعة وباصدّقهم، بس برضه رجعوا يبعدوا بالتدريج، وأنا مش حابة، ولو قلت لماما هتقول لي دول مش أوفياء وبلاش تبقوا صحاب، علشان ماما أساسا بتكرهني وبتكرههم، ومش عايزاني أصاحبهم تاني ماعرفش ليه، سألتها بس قالت لي شاكة فيهم. كل اللي عايزة أعرفه إزاي أخلّيهم مايبعدوش عنّي علشان هما مش عارفين أنا باعيط قد إيه. mylove
مشكلتك صغيرة وبسيطة، ومش محتاجة غير شوية صبر وحب عشان تتحل، أوّل حاجة خليكي دايما هادية وإنتي بتكلّمي مامتك وباباكي في الموضوع ده، واعرفي إنهم مش ضدك، ومستحيل مامتك تكون بتكرهك لأنك حتة منها، ومافيش حد بيكره حد بيعمل له أكل كل يوم وبيشتري له لبس في العيد، وبيكون عايزه ينجح. وأنا متأكّدة إن مامتك بتعمل لك كل ده وأكتر، وصدّقيني هما برضه مش بيكرهوا أصحابك، هما بس بيحبّوكي وعايزين مصلحتك، وخايفين أصحابك يشغلوكي عن مذاكرتك، ومهمتك إنك تثبتي لهم إنك عارفة مصلحتك كويس، وإنك طول الوقت قد المسئولية، وده مش محتاج مجهود كبير، كل الحكاية إنك تقولي حاضر دائما وتتناقشي بهدوء في نقط الخلاف. أمّا بالنسبة لمشكلتك مع أصحابك فحلها هو الحب، يعني دايما ابدئي بالسلام والتحية، حتى لو كنتي مضايقة من الشخص اللي قدامك عشان تكوني دايما الأفضل، وخليكي قريبة منهم.. أنا عارفة إنه ساعات مع السنة الدراسية الجديدة بيكون في فصل جديد وأصحاب جداد، ويمكن تنسي أصحابك القدام خالص، وفي الحياة عموما بنقابل ناس وبنبعد عن ناس، وبنقرّب من ناس تانية، وده أمر طبيعي. أنا فاهمة إنه طبعا في حالتك الصداقة عمرها 8 سنين ومهمة ليكي، ومحافظتك عليها هيكون بمعاملتك الحلوة ليهم، وبأخلاقك وابتسامتك ولسانك اللي مش بيغلط أبدا، وحاولي تسامحي وتغفري وتنسي أي مشكلة بدل ما تقعدي تعيّطي وتحزني؛ لأن كل حاجة بتتولد صغيرة وبعدين بتكبر، إلا الحزن والمشاكل بتتولد كبيرة وبعدين تصغر، وبعد شوية المشكلة دي هتنتهي وتختفي من حياتك خالص وهتنسيها مع الوقت، وربنا معاكي ويوفّقك.
