مع رانيا.. وصفات من الطبيعة لشعر صحي وبشرة كلها نضارة

أعده للنشر: أسماء مصطفى
أهلا بكل بنات "قمر 14"، في حلقة جديدة من حلقات "جمالك من الطبيعة مع رانيا"..
في حلقة النهارده هنعمل وصفات للتخلص من قشرة الشعر والحصول على شعر صحي وقوي، كمان هنعمل صابون في البيت من مكونات طبيعية، والزيوت بالأعشاب للمساج ولتغذية الشعر..

أول حاجه هنعملها هي تحضير زيوت مشبعة بالأعشاب، هنجيب أعشاب اللافندر أو الروز ماري مجففة، ونختار نوع واحد نستخدمه ونعمل بيه دهان للشعر والبشرة، المعايير هنا مرنة، يعني سايبين الكميات مفتوحة كل واحدة تقدّرها بنفسها.
المكونات
أعواد أعشاب لافندر مجففة
زيت زيتون
الطريقة
هنحط أعشاب اللافندر في زجاجة زجاج، ونضيف عليها زيت الزيتون ونقفلها كويس ونرجهم سوا، بعدين نسيبهم لمدة 3 شهور.
الوصفة دي لو للشعر هنصفيها وهنستخدمها كحمام زيت بعد الشاور، وكمان ممكن نستخدمه كزيت مساج للجسم بدون تصفيته، وبيكون مفيد لكل أنواع البشرة عدا البشرة الحساسة.

إضغط لمشاهدة الفيديو:
صابون الورد والسمسم
المكونات
نص كوب خلاصة السمسم (مغلي السمسم)
صابون جونسون للأطفال مبشور
كمية صغيرة من زر الورد
3 ملعقة صغيرة زيت ورد
الطريقة
هنغلي خلاصة السمسم على النار، وبعدين نضيف عليه صابونة جونسون مبشورة ونتركهم دقايق على النار ونقلبهم كويس بالمضرب، بعدين نرفعهم من على النار ونضيف زر الورد الأحمر، ونرجعه تاني على النار ونستمر في التقليب، ونضيف عليهم زيت الورد، ونقلب كويس لحد ما المكونات تنعم، بعدين نصبّها في إناء أو قالب ونتركها تنشف.
الصابون ده بيدي نضارة ونعومة للبشرة وكمان ريحته حلوة ومنعشة.

إضغط لمشاهدة الفيديو:
لوسيون طبيعي لتغذية الشعر ومحاربة القشرة
المكونات
10 فصوص ثوم تقريبا
1⁄4 زجاجة خل تفاح
3 ملعقة صغيرة كحول نقي (سبرتو)
2 ملعقة صغيرة عسل نحل
الطريقة
هنقطع الثوم بدون تقشير، ونقلب الكحول والعسل والخل كويس جدا، بعدين هنحط المكونات كلها في زجاجة زجاج ونرجّها كويس جدا، ونتركها من 3 ل4 أيام، بعد كده هنصفيها ونحطها في زجاجة بخاخ.
لما نيجي نستخدم اللوسيون ده هنفرق الشعر 3 أو 4 أجزاء، ونرش اللوسيون في مفارق الشعر وندللكه ونسيبه لمدة 10 دقايق تقريبا، بعدها ندخل ناخد شاور ونغسل الشعر.

إضغط لمشاهدة الفيديو:
ماسك مقاوم لتجاعيد البشرة
المكونات
ملعقة كبيرة لبن بودرة
ملعقة كبيرة بودرة اللوز
ملعقة كبيرة شوفان مطحون
ملعقة صغيرة جل الصبار
1⁄2 ملعقة صغيرة عسل نحل
ماء سمسم
زيت ياسمين
ماء زهر
الطريقة
1- هاخلط المكونات الجافة مع بعض كويس، وبعدين نقسمها لنصين، لو البشرة شديدة الجفاف هنضيف نقطة زيت ياسمين ومعلقة جل الصبار على كمية منهم ونخلطهم سوا، ونستخدمها كصنفرة للبشرة وأسيبه على الوجه لمدة من 20 ل40 دقيقة وبعدين أشطف بشرتي..
2- لو البشرة عادية ومش جافة أوي، هناخد الجزء اللي شيلناه من المكونات الجافة، ونخلطها بنصف ملعقة عسل نحل ومنقوع السمسم ونخلطهم كويس، وبعدين نفردها على الوجه كله.
الماسكات دي تقاوم التجاعيد، وترطب البشرة وتجدد خلايا الجلد وتحافظ عليها من الأكسدة.
ماسك للجسم بزيت العنبر
المكونات
2 ملعقة صغيرة رز مصري مطحون
3 ملعقة صغيرة نشا
ملعقة صغيرة زيت العنبر
الطريقة
هنخلط النشا والرز وزيت العنبر، وهنضيف عليهم شوية ميه وندوّب فيها المكونات، وهنستخدمه وهو طري لأنه لو استنى هينشف، هنفرده على الجسم وندلكه وبعدين نسيبه على الجسم لحد ما ينشف بعدين نشطف الجسم، الماسك ده ممكن نعمله مرة أو مرتين في الأسبوع.

إضغط لمشاهدة الفيديو:
وبكده تكون خلصت حلقتنا،،،
استنونا في حلقات جاية كتير،،،
سلام،،