مع رانيا.. مية الورد وكرات النشا لتنعيم الجسم

أهلا بكل بنات "قمر 14"..

النهارده معانا حلقة جديدة من حلقات "جمالك من الطبيعة مع رانيا"..

هنعرف فيها إزاي نعمل مية ورد طبيعية من الورد البلدي..

وكمان هنعمل لوسيون العنب لعلاج التجاعيد، تابعونا.

لوسيون العنب
هنجيب أي نوع من العنب عندنا سواء الأصفر أو الأحمر أو الأسود، ونعصره بالخلاط أو بأي طريقة، وممكن كمان نعصره بأيدينا.
ممكن نحتفظ باللوسيون ده في التلاجة لمدة يومين فقط، هناخد منه بقطنة ونمسح به وشنا كله في الاتجاه من أسفل لأعلى، وكمان منطقة حول العين، ونسيبه لمدة من 10 : 15 دقيقة وبعدين نشطفه بالميه، هتحسّوا بنتيجة هايلة جدا في ترطيب البشرة ولمعانها وروقانها.

لوسيون العنب للبشرة الدهنية
المقادير:
* معلقة كبيرة عصير عنب
* معلقة صغيرة عسل نحل
الطريقة:
هنخلط العنب والعسل خلط جيّد جدا، وبعدين نبدأ نستخدمه على البشرة الدهنية، هنسيبه لمدة 10 : 15 دقيقة، وبعدين نشطفه بالميه.
الماسك ده بيساعد على تفتيح البشرة نصف درجة، وبيروّقها وينقيها وينعمها، وطبعا بيحارب التجاعيد اللي في البشرة.
لوسيون العنب للبشرة الجافة
المقادير:
* معلقة كبيرة عصير عنب
* معلقة صغيرة عسل نحل
* معلقة صغيرة لبن
الطريقة:
هنخلط كل المكوّنات كويس، ونحطّه بقطنة على البشرة، ونسيبه لمدة 10 : 15 دقيقة وبعدين نشطفه بالميه.
طبعا الماسك ده بيرطّب جدا وبينعم، وبيعتبر كمان غسول للبشرة ومنظّف لأنه فيه لبن، وبيدّيها لمعان وروقان.

إضغط لمشاهدة الفيديو:
مية الورد الطبيعية
المقادير:
* 3 وردات بلدي
* 1/ 2 كوب ميه سخنة
الطريقة:
ممكن تستخدموا أي نوع من الورد؛ سواء الأحمر أو الأصفر أو البمبي، هنقطع أوراقه ونحطّها في حلة ونحط معاها الميه، ونقلّبها ونسيبها تغلي على النار لمدة من 5 : 10 دقائق، هتلاقوا لونه بقى أحمر طبيعي زي لون شربات الورد.
ممكن نحتفظ بالميه دي في التلاجة لمدة 3 : 4 أيام فقط ومش أكتر من كده، وهي مفيدة لكل أنواع البشرة؛ لأنها بترطّب وبتغذّي جدا، وممكن نستخدمها على الوش وكمان للجسم كله.
من الحاجات الحلوة اللي ممكن نعملها؛ هي إننا ممكن نجيب باقة من الورود بألوان مختلفة، ونقطّع أوراقها، ونحطّها في البانيو في ميه سخنة جدا، ونسيبها لمدة ربع ساعة، وبعدين ناخد الشاور في الميه، هتحسّوا بنتيجة حلوة أوي من ترطيب وتغذية وكمان تعطير للجسم.

فوائد التين للبشرة
هناخد قلب التين من جوه، ونبدأ نعمل به تدليك على البشرة من أسفل لأعلى، وكمان عند منطقة العين ومنطقة الرقبة، ويُفضّل كمان إننا نسيب أجزاء منه على أي منطقة يكون فيها حبوب أو بثور، ونسيبه لمدة 15 : 20 دقيقة وبعدين نشطفه، وبعد كده نقدر نكرّره مرة كمان على بشرتنا.
التين ده فوايده هايلة جدا للبشرة؛ لأنه بيساعد على الترطيب والتنعيم والتغذية، وكمان بيساعد على إزالة الحبوب الصغيرة والبثور السودا، وكمان ليه فوايد كتيرة جدا للشعر هنعرفها مع بعض في الحلقات القادمة.

إضغط لمشاهدة الفيديو:
كرات النشا للجسم
المقادير:
* 3 ملاعق كبيرة نشا
* 3 ملاعق لبن بودرة
* 2 : 3 ملاعق زيت ورد
الطريقة:
هنخلط اللبن مع النشا كويس أوي، وهنستخدم اللبن حسب نوعية البشرة؛ يعني لو البشرة دهنية هنستخدم لبن خالي الدسم، ولو بشرة جافة يبقى هنستخدم لبن كامل الدسم.
وبعدين نحط عليهم مقدار زيت الورد المناسب للخليط؛ يعني نحط ملعقتين ونخلط ونشوف العجينة هتكون ليّنة ولا لسّه، ولو لقيناها لسه ناشفة يبقى هنزوّد ملعقة أو اتنين كمان من الزيت ونخلطها كويس؛ بحيث تعمل عجينة ليّنة، وتتشكّل على شكل كرة بسهولة.
هنسيب الكرات دي تنشف في الهوا لمدة 3 أيام، وبعد كده ممكن نخزّنهم في علبة زجاج، بس نسيب فيها جزء للتهوية علشان نقدر نحتفظ بها فترة أطول في مكان جيّد التهوية.
طريقة الاستخدام:
هناخد من الكرات دي ونحط عليها ميه سخنة جدا، ونسيبها لمدة ربع ساعة لحد ما تدوب تماما، هتدّي قوام زي الشوربة اللزجة ونقلّبها كويس، وبعدين نبدأ نحط منها على الجسم كله وعلى الوش، وكمان عند منطقة العين والرقبة وتحت الإبط.
هنسيبها على الوش والجسم لمدة نصف ساعة وبعدين نشطفها، هتدّي نتيجة هايلة لبشرة الوجه والجسم، وممكن كمان نضيف معاها عسل بعد ما ندوّبها في الميه، ودي هتناسب البشرة الجافة جدا والمتشققة، وكمان ممكن نحط منها على الشفايف هترطّبها وتغذّيها.

إضغط لمشاهدة الفيديو:
خلصت ماسكاتنا النهارده..
استنونا في حلقة جديدة وماسكات جديدة..
وكمان أفكار وافتكاسات جديدة..
سلام،،،
*********************
للرجوع للحلقات السابقة
اضغط هنا "جمالك من الطبيعة مع رانيا"
*********************