طلعت السادات: مع احترامي لكل الناس اللي عايزه تركب الثورة نقول لهم شكرا الجيش موجود!

بانفعالاته "البرجماتية" ولغته "الفطرية" المصرية الصميمة رغم بلاغته كمحام مشهور ومشهود له بالكفاءة ونائب سابق في البرلمان قدم الكثير.
ورغم بساطته المعهودة، في لغة الحوار والانفعال والحزن والفرح معا، إلا أنه يحمل "قلبا" مصريا شفافا، ربما تخرج منه الكلمات مثل طلقات الرصاص بلا حساب، حتي للأقربين منه، لكنه فلاح، طيب يعيش "بثوابت" وطنية خالصة وعفوية وصافية.
ولان طلعت السادات صاحب الكثير من المواجهات والمصادمات والكثير من القضايا التي تصدي لها بدافع حب طين هذا البلد، حتي انه مثلما قال في حواره مع "صوت البلد" انه توقع اندلاع ثورة الشباب، بل انه منذ خمس سنوات حينما كان عضوا بمجلس الشعب، صرخ تحت قبته "يا جدعان" لازم الرئيس مبارك يقوم بثورة التصحيح".
فهو من "جدعان" العمل السياسي والحزبي، يقول ان مصر في حالة "حمل" او "مخاض" وان الجيش هو الحل في مرحلة انتقالية يتم فيها تصفية جيوب الفساد التي "اغتالت" مصر!
ونبه كل الناس من الاحزاب والرموز وحتي الجماعة المحظورة من ركوب الموجة وسرقة "ثورة" الشباب وعلي حد قوله "نقول لهم شكرا.. الجيش موجود" !، بل انه وجه تحذيره للخارجين علي القانون بما فيهم جماعة الاخوان والبرادعي وجماعته انه "فات عهد كلام الأونطة"!
- في الحوار الذي تم تسجيله مع طلعت السادات، وننشره حرفيا، رغم حذفنا- مع الاعتذار له! لبعض اهانات وجهت لبعض رموز النظام.
- في البداية سألناه هل ترشح نفسك رئيسا للجمهورية بعد تعديل مواد الدستور؟
رد بتلقائية وكأن حال سبيله يقول: هو احنا عارفين مصر رايحه علي فين!!
لذا جاءت اجابته القاطعة: دي حاجات بتاعة ربنا! وهذه اولي خيوط .. الحوار !!
- هل كنت تتوقع هذه الاحداث التي تفجرت يوم 52 يناير بثورة الغضب؟
نعم، توقعت، ونبهت وقلت منذ خمس سنوات في مجلس الشعب، وقلت يا جدعان لازم الرئيس مبارك يقوم بثورة تصحيح، انا قلت كده!
- في ظل تداعي الاحداث المؤسفة، ما هو المطلوب لإنقاذ مصر؟
في مجلس الشعب طالبت الرئيس مبارك بثورة تصحيح، وقلت لازم يجيب ويشكل حكومة من العسكريين وانا طالبت بهذا كثيرا، حتي ان الاخوان المسلمين زعلوا مني و"بتوع" الحزب الوطني، علاوة علي الجماعة المنافقين في المجلس، وانا شايف مصر حبلي، وفيه ناس تقولك ده احتقان، احتقان مين يا بني ده حمل، ده حمل!
- يقال والشواهد كثيرة ان جماعة الاخوان المسلمين (المحظورة) حاولت ركوب ثورة غضب الشباب؟!
جماعة الإخوان المسلمين هم مصريون وكل واحد يقول ويعبر عما يريده، وهناك كل التيارات مش بس الاخوان.
- مقاطعا: لكن بعد الانتخابات البرلمانية كان المرشد قد اطلق تصريحات غاضبة وقال: ان مصر سوف نولعها كرد فعل عما حدث من تزوير.. وقد حدث؟!
لا، لا كل ده كلام فارغ، بلا إخوان مسلمين وبلا إخوان مسيحيين، هذه ثورة الشعب، كما ان اي ثورة في الدنيا لابد ان تكون لها اخطاء وضحايا وهي الحامل لما بتولد مش بتنزل الوريد ويبقي فيه شوية ميه وشوية دم وشوية صريخ وهي بتولد، وهما دول شوية الجماعة الخارجين عن القانون، اللي عايزين يصوروا، ويركبوا الثورة ونقول لهم دول شوية حرامية .. لا .. لا .. لا ده فات عهد كلام الاونطة.
- ما تعليقك علي الإجراءات التي اتخذها الرئيس مبارك بإقاله الحكومة وتعيين حكومة جديدة وتعيين نائب للرئيس الوزير عمر سليمان؟
في الوقت الضائع، في الوقت الضائع خلاص، كان عدي الكلام ده، كل ده مالوش لازمة .
- ما قولك عما قيل عن هروب بعض رجال الأعمال ورؤوس الأموال الي الخارج؟
قلت لابد من غلق المجال الجوي المصري امام المغادرين، والقبض علي كل رموز الفساد في مصر وإيداع الرئيس مبارك في مستشفي المركز الطبي العالمي الموجود في طريق الاسماعيلية لحين انتهاء فترته مع إعلان القوات المسلحة انها تتولي مقاليد الحكم في البلاد يا أخي دي تركيا سبقتنا بعشرين عاماً. فالجيش تولي الحكم في تركيا وبعد عامين بدأ تداول سلمي للسلطة والحياة الديمقراطية وخلاص بس ده عقبال ما يمسكوا شوية الحرامية وعقبال ما يلموا الحاجة، واللي اتسرقت ويصادروها تأتي، وهتقولي تأمين، تأمين. مصادرة علي طول علي كل الاموال للذين افسدوا النظام في مصر، مصادرة املاكهم، واموالهم لان ده حق الشعب، فين احمد عز وابوالعينين وافراد عصابات السلطة، باعوا كلهم حسني مبارك قولي من حوله الان!
- كيف تري سيناريو الاحداث القادمة؟!
اتمني ان الجيش يعلن استيلاءه علي الحكم، وان تكون مقاليد البلاد في ايدي الجيش، والا يبقي احنا بنضحك علي روحنا ويبقي الثورة اتسرقت، وظل النظام كما هو لاني ان شايف دلوقتي الناس اللي بتتكلم وتحاول ان تظهر بأن لها علاقة بهذه الثورة وهم الآكلون علي جميع الموائد، ويتلونون، حتي انني شاهدت بعض المخبرين كانوا يعملون طرف حبيب العادلي الان يتحدثون عن الديمقراطية والاصلاحات وينتقدون بعض الانتقادات وكلام مالهوش أساس، لكن حد فيهم يقدر يقول كلمة حق في حق حبيب العادلي، مش ممكن طالما الناس دي لسه عندها ولاء لمثل هذا الرجل، يبقي الناس دي لا علاقة لها بالثورة، دول شوية حرامية جايين يضحكوا علينا ويسرقونا ويهددونا.
- ما رأيك بتشكيل الحكومة الحالي وعلي رأسها رجل عسكري؟!
حكومة عسكرية.. هو ده الشغل الصح يبقي كده أنا عايز الجيش اللي يمسك البلد.. الجيش.. الجيش .. الجيش!
- مع تعديل الدستور ومنح فرص لمارثون انتخابات رئاسة الجمهورية، هل تفكر في الترشيح؟!
إذا الجيش النهاردة اعلن استيلاءه علي الحكم وإدارة البلاد، يبقي طبعا مش هيبقي فيه انتخابات رئاسة مقبلة، لازم هتؤجل، ودي مش مشكلة، ايه يعني لما نقعد حتي سنتين، ما احنا قاعدين من غير رئيس طول الفترة اللي فاتت، كان بيحكمنا شوية عيال..
ايه لما يبقي يحكمونا دلوقتي رجاله، مفيهاش حاجة عقبال ما ينظفوا ويطهروا وبعدين يدعو إلي انتخابات رئاسية بعد الفترة الانتقالية.
- يعني بعد كل هذا سوف ترشح نفسك؟
دي حاجات بتاعة ربنا!
- هناك مطالبة من الشعب والمتظاهرين لمحاكمة رموز النظام الذين أفسدوا الحياة السياسية في مصر وهو ما حدث بعد قرار النائب العام في حق احمد عز واحمد المغربي وزهير جرانة والعديد من الرموز فما قولك؟
لابد من محاسبة كل رموز النظام الذين ساهموا في إفساد الحياة السياسية في مصر، بس تكون هذه المحاسبة في شكل محاكمات علنية وجادة مش بس لامتصاص غضب الجماهير.
- د.البرادعي والبيان الذي اصدره من داخل ميدان التحرير وسط المتظاهرين ما رأيك هل يصلح للمرحلة المقبلة؟
الجيش، الجيش، بلا برادعي ولا غيره مع احترامي لكل الناس ده، مش دول اللي هيعيدوا الانضباط ويطهروا البلد ويعيدوا الحياة الديمقراطية، الجيش وحده هو القادر علي تحقيق ذلك، وكلامي واضح مع احترامي لكل الناس اللي عايزة تركب الثورة، نقول لهم شكرا، الجيش موجود!
- هناك من يطالب باعتقال المرشد العام للإخوان المسلمين باعتباره احد المحرضين علي الثورة، او الذين انجرفوا بمسيرتها الي حالة الفوضي، والعنف الذي شهدته؟!
يعني هيعتقلوا الشعب كله، الثورة بدأت بالإصلاح وانتهت بالتغيير، والناس نازلين من رحم مصر، بيقولوا الإصلاح، الاصلاح لما انا بأطالب بالإصلاح تضربني بالنار وتقتل اكثر من 051 واحد، ليه، ليه يا أخي، حرام عليك كل ده. واعتقال المرشد ليه، لمجرد ان دعا للتغيير والثورة .. يا سيدي خلصت القصة، وعلي النظام ان يحمل عصاه ويرحل!
- هل تري ان النظام كان يعاني من الافلاس السياسي والتخبط في قراراته؟
الافلاس ده، من زمان، واللي بيحصل دلوقتي عملية التفاف علي الثورة، واحتواء لرموزها، الضحك علي المصريين،وانا لا اعتقد ان المصريين هينضحك عليهم تاني، ولو انضحك عليهم ، مش هينضحك علي الجيش، فهم اول ناس عانوا.. من النظام فهو غير راض عما يجري ولا كان راضياً عن ممارسات وزارة الداخلية، ولا راضياً عن الدستور.