الشاعر الكبير عبد المجيد راشد يكتب قصيدة المسحراتى : مهداة إلى روح " المناضل محمود نور الدين "

بصرخ ليلاتى
على طبلة صوتها
أنين ناياتى
اصحوا و فوقوا
لكل آتى
أوجاعنا جارحة
و دموعنا سارحة
أوضاعنا شارحة
من غير ما هاتى
الاسم نور الدين
طرح البساتين
زهرة مقاومة
من شوك التاريخ طالعة
الإسم محمود
و السيرة أمة
بهية الحضرة و الطالعة
عنوانه جرح الوطن
بحساب و بمطالعة
موصول يا قلب البلد
بوريده
معزوف يا لحن الأمة
فى نشيده
محمية يا مصر
بقلبه الشجاع و بإيده
لما تقول مين الوطن
و أمتى مواعيده
تلاقى نور الدين
طالع فى يوم عيده
مسحراتى
بعلو صوتى و أقول
قلب الوطن موجوع
صوت البكا مسموع
صهد الجروح و الدموع
ما يبلسمه غيره
و جنود فى ثورة مصر
مصر التاريخ و العز
مصر اللى تصحى تهز
تقطع رقاب اللى خان و تجز
مين غيرك يا نور الدين
يسهر ينادى
فى الحضر و البوادى
الأمريكان و الصهاينة أعادى
ليوم الدين
مين غيرك يا نور الدين
يلملم الأشلاء
و يحضن الشهداء
و يرهب الأعداء
و يجود بدمه
و لا عمره همه
سجن
أو عتمة
أو كلاب ضالة
منساقة بحبال
واصلة لبيت
أبيض فى شكله
و جواه كل السواد و الغل
و انت الوحيداللى عود الفل
تملا نفوسنا أمل
تملا نفوسهم ذل
انت الفريد فى الكل
قلبك عمار ما يكل
روحك مداد ما تمل
الله عليك يا نور
يا شهيد يا عود الفل
مسحراتى و انادى
يا ولادى
يا احفادى
الاسم محمود
و نور الدين
منقوش فى قلب الأمة
إسم و رسم
معنى و همة
فكرة و مهمة
محفور فى صفحات التاريخ
زهرة مقاومة
متصدرة القمة
محمود يا نور الدين
يا جذر له أوتاد
صورتك فى قلب
البنات و الولاد
و كل جذر
و له فروع و معاد
مسحراتى بطول البلاد
اصرخ ليلاتى
اصحوا و فوقوا
لكل آتى
رمضان كريم
شهروعظيم
فيه العظات
و المعجزات
و الانتصار
الفجر لازم يولد نهار
و الصبح مولود من نور و نار
مسحراتى
و فى انتظار
الأمة ترفع
راية انتصار
رمضان كريم
يا نايم اصحى
وحد الرزاق
الخميس
الأول من رمضان 1428ه
13 سبتمبر 2007