بلهجة مصرية .. عاطف محمد كامل يكتب عن توعيات للإعمار وترك الأثر

ياعم انت خد أقولك كلام لازم تقراه وتفكر فيه
انت عايش ليه؟
عارف يعني إيه تعيش؟ يعني يكون ليك أثر.. ليك بصمة.. ليك دور! مش عايش وخلاص بتاكل وتشرب وتنام وتعيط لما الكهربا تقطع، أو تزعق لما الميه تتأخر!
فين دورك؟ فين دورك ف بيتكم؟
لما تلاقي حنفية بتخر، تعمل نفسك مش واخد بالك؟
لما تلاقي لمبة محروقة، تقول "ما هو أبويا موجود"؟
يا ابني ما هو انت كبرت، وده بيتك زيه زيه!
ولا انت فاكر الإعمار والنهضة يعني تبني عمارات؟
الإعمار يبدأ من بيتك، من حيطتك، من سلوكك، من شغلك حتى لو بسيط. واحد يصلّح كرسي مكسور، واحد يلمّ ورقة من الأرض، واحد يعلّم أخوه الصغير، واحد يقول كلمة طيبة لحد مكسور... كل دي أعمار... مش لازم تبقى مليونير علشان تبني، بس لازم تبقى بني آدم علشان تحس بمسئوليتك. المشكلة إن أغلبنا مستني الحكومة، مستني أبويا، مستني أخويا، مستني أي حد يتحرك.. طب انت فين؟
انت نفسك عملت إيه؟ حتى لو مشيت يومك كله وسط الخراب، حافظ على نقطة نور صغيرة، على لمسة جمال... على ركن نظيف، هيفضل ليك قيمة. اللي بيعيش في الدنيا دي من غير ما يصلّح، بيسيبها أوحش من ما دخلها!
ما تبقاش واحد من دول. خليك من اللي بيصلح، بيبني، بيجبر، حتى لو بالقليل ولاحظ ان الايام بتمر بسرعه وشوف بقالك قد ايه بتقول بكره هعمل .. خد خطوة وجرب تكمل .