عجبى عليكى يا شجرة الخريف المتهالكه

يا شجرة الخريف المتهالكه
اصبحتى عريانه وفروعك هابطه
هبت النسائم الحارقه
طيرت اوراقك الشايطه
وعجبى
مثلك مثل شجرة السنطه
ثمارك صمغ لاصق
فى الشقوق لابده وحاطه
فروعك كلها أشواك
حاده وقاطعه
طالت وإتفرعت بالأونطه
وعجبى
طلعتى فى أرضنا
غصب عننا
تلاتين سنه
شوكك جرح إدينا وقلبنا
إتألمنا من الجروح
والدم بينزف مننا
وكل فتره نقول هانت
هتبعدى عننا
بقدرة أشواكك الجارحه
نلاقيكى واقفه
زى مانتى شايخه
وعجبى
وإحنا زى ماحنا
زهقانين وقرفانين
والخوف مالينا ومرعوبين
من أشواكِك الطويله
الحاده زى السكاكين
فتره تروح وفتره تيجى
أمر من إللى قبلها
والأرض إللى كانت عمرانه بالخير
بقت صحرا قالحه
أتاريكى بتشربى يا شايخه
كل المايه من أرضنا
من غير فايده
وإنتى يا وش الفقر سارحه
وعجبى
وكل ما نزرع زرعه تطلع خرعه
لأنك يا سنطه ضعفتى أرضنا
مبقاش فيها خير زى الغير
إللى كانوا أفقر مننا
وخلتينا نمد إدينا لغيرنا
ونرضخ لطلباتهم الجارحه
وعجبى
بركان الكبت إنفجر
حلفنا نقطع كل الشجر
إللى زيك من غير منفعه
علشان نطهر أرضنا
قبل ما يجيى الربيع
نجهز أرضنا
للورود الجميله اليانعه
نتنسم عبيرها وعطرها
نفرح قلوبنا بروعة ألوانها
ونزرع حواليها بذور المحبه
علشان أمنا مصرنا
ست الكل الشامخه