يا نهار بلاك

جالنا صداع .. ومرض جديد اسمه "بلاك بيري" .. ومن أجل التحديد البلاك بيري ده نوع من انواع المحمول ، علشان الناس الغلابة اللي متعرفوش ، فلا تفتكر أنه علاج جديد للسكر ولا مدرب أجنبي جاي يمسك المنتخب.
ما علينا المهم في الفترة الأخيرة تصدرت اخبار المحترم " البلاك بيري" صفحات الجرائد وشاشات التليفزيون ، الكل يرغي ويزيد المعلومات عن حظره أو عدمه ..
لذلك أصبح اللي معرفش عرف ، واللي ما شافش شاف فالحديث يتسع وينتشر ويتوغل حتي وصل إلى الناس .. واللي على اده بيسأل :
هو ايه البلاك بيري ده ؟
ايه الإمكانيات اللي فيه خلت الدنيا تتقلب عليه بالشكل ده ؟؟
للدرجة دي إمكانياته كويسه ؟؟
وطبعا بما اننا بلد ام العريف كل واحد بيفتي شوية عن إمكانياته الجباااره ، فانتشر البلاك بيري بسرعه الصاروخ ، و كأن الأمر مدبر لصالح الشركة المصنعة ..
طبعا دعاية مجانية كانت حتكلفهم ملايين
كل العالم يتحدث عن منتجهم العملاق الرهيب ... و في الاخر الحكومات صرحت بيه
ماهو لازم تصرح بيه ايه علاقة البلاك بيري بالارهاب ، هما نسيوا ان احداث 11 سبتمبر كان لسه البلاك بيري مظهرش ، ولا نسيوا العمليات الانتحارية اللي بيفجروا انفسهم فيها ولا الأتوبيسات السياحية اللي أضربت .. كل ده حصل قبل البلاك يااا ناااس .. يا نهااار بلاك
خلاص خلصت الأزمات و المشاكل اللي بنعاني منها و ممكن تعملنا كوارث ..
نسينا ازمه القمح اللي ممكن تخلينا مش لاقيين العيش الحاف
نسينا ازمه الميه اللي ممكن بسببها منلقيش ميه نشربها بسببها
صحيح بنيجي في الهايفه و نتصدر
ولنااا الله في مصر ام الدنيا و البلاااااك