يا عالم يلي فوق .. بقلم محمد الوكيل

الميه بتخر علينا
ما تصلحوا الحنفية
واتقوا ربنا فينا
**مالك يا أم أنور بتزعقي
كده ليه ؟؟
ما تشوفي بيت تاني ما
أنتِ على قلبك يجي
تلاتين تلاف جنيه
*** والله وطلع لك صوت
يا برص الحيط يا
إبره مصديه ف وسط الغيط
طب والنبي ومن جعل
النبي نبي لولا الجيره
لكنت صورت في البيت
فيلم أجنبي
ولولا سنيه جنايات أمك
كانت صحبتي لكنت دقيتك
في الهون ذي الكفته
ووزعت منك على كل بيت حته
يا خايب يا نايب
يا جلاب المصايب ...
يا خساره يا جدعان
فين أيام زمان فين الجيران
اللي كانوا أغلى الحبايب ؟؟
فين حلة المحشي
فين طبق الملوخية
يامه لفوا عالبيوت
هدية من ايد الست سنية
دلوقتي كل واحده بتداري
اللي في كيسها عشان
عيون الجار قنبلة وقتية
واتغير الزمان واهو
راح الأمان وبقت الدنيا مش هيه
واستعذنا بربنا من جار
له عين تخلي الفراخ النيه مشوية
ربوا ولادكم عالدين والإيمان
ولا تجعلوا الأخلاق عالرف منسية