غنائيات زوج سعيد جدا ..

بما أنى أسعد زوج فى العالم و بما أننى صاحب قلب حنون و تعاطفا مع الأزواج التعساء فقد أنشأت ( مقهى الأزواج التعساء) و قسمته إلى أركان حسب الحاله فمنهم من دماغه لسع و منهم فيوزاته لمسّت ومنهم على وشك الجنون و منهم من يكلم نفسه ومنهم من يضرب دماغه فى الحيطه..و حالات أخرى متنوعه..
و أقوم بعمل جلسة مع زوج تعيس يفضفضلى بمكنونات نفسه ثم أقوم بتأليف أغنيه ساخرة كوميدية تعبر عن حالته.
و نبدأ اليوم بحالة الزوج الذى غضبت زوجته و سابتله البيت وكانت فرحته عظيمه و لكنها رجعت تانى و كانت صدمته أعظم و قمت بتأليف أغنيه تعبر عن حالته كما يلى :
أغنية (خرجت من البيت ) تأليف ::علاء الغندور**الاغنيه مسجله فى الشهر العقارى وكافة الحقوق محفوظه
خرجت من البيت زعلانه وقالت مش راجعه
وعشرة السنين الطويله كلها معاك أنا بايعه
سألتها رايحه على فين شاورت بأيديها وعملت مش سامعه
ماصدقتش ودانى وما صدقتش عينيه انها ماشيه عينيها دامعه
وقرصت وشى وقرصت جسمى بايديه معقول الجباره يطلع فى عينيها دمعه
مش مصدق انى خلاص خدت الحريه بصيت عليها لقيتها مشيت بصحيح
ولقيتنى بأبكى بقلبى ودموع عنيه لما خدت هدومها يعنى هجر صريح
يعنى خلاص راح زمن العبوديه افرح يا قلبى وغنى شويه شويه
واكسر زير ورا الست ديه وتسقط كل الستات النكديه
وهأقضى اجمل نهار وهأبوس كل الأزهار
خلاص هأرجع لاصحابى واحضن كل أحبابى
وآخد من الدنيا منابى ومشيت اسلم على كل الناس
اللى فرحان واللى زعلان واللى شارب من نفس الكاس
رجّعت شبابى ولبست الوان من عصير الحريه شربت الكاس
ورجعت البيت سعيد فرحان وتحت رجليه الذكريات المرة تنداس
وعملت أحلى عصير برتقان وكمان أحلى عصير اناناس
ونمت سعيد من غير أحزان وفجأه صحيت على صوت كابوس
وخرجت بسرعه ابص من البلكونه لقيتها راجعه تانى وطلع نأبى على شونه
آه يا فرحه ما تمت يانهار يا خسارة ..فرحه خدها الغراب وطار