رسالة من شهيد ...... بقلم أحمد الشيخ

يوم الثورة قلت حشارك ..مبقاش فارق
ام اموت اما اعيش و الراس مرفوع
و لقيتنى بهتف و بلالى
صوتى كان عالى ..كان مسموع
ضد الظلم و ضد الجوع .. طبعا حقى و شيئ مشروع
مش ممنوع
طالع سلمى .. ماسك علمى
فى سبيل حلمى.. حضحى بدمى
لسه بهاتى ضربوا اخواتى ..قلت الاتى :-
خاين اللى بيضرب طلقة فى صدر اخوه
خاين يمكن طلقة تيجى فى ابنه فى اخته فى امه
و يمكن ابوه
عليت صوتى .. امروا بموتى
لسة حنادى و اقول يا بلادى
عايز حقى و حق اولادى
جاتلى رصاصة .. بايد قناصة
جسمى اتنمل .. قلت حكمل
قبل ما اكمل جتلى التانية
هب فى ثانية ..رحت فى دنيا غير الدنيا
شفت مناظر ملهاش زى ..شفت الفرحة فى بكرة الجى
شفت سمانا تمطر ضى
شفت كتير و كتير و كتير
شفت المشهد فى التحرير .. شفت شباب حلفين تغيير
شفت الحب و شفت الخير .. شفت الناس عايشيين بضمير
شفت الحق و مفيش فرق .. غفير و وزير
شفت نزاهة .. شفت نزاهة و حرية تعبير
و خلاص تانى مفيش تزوير
شفت عدالة .. و ناس شغالة
شفت الهندسة فى التعمير
شفت ولادنا فى قلب بلادنا
حققوا حلمنا بالتطوير
شفت حاجات .. وحاجات .. و حاجات
شفت جراءة فى قلب بنات
شفت ولاد وقفين بثبات
شفت حقوقنا و رجعت لينا
احنا الشعب و مين يعادينا
عهد الظلم خلاص عدينا
و ادى احلامنا اهة فى ايدينا
شفت حضارة .. شفت ايدين مليانة مهارة
شفت بلادنا الغالية علينا
لكل شعوب الارض منارة
شفت سياحة ..شفت الناس عايشيين مرتاحة
شفت رقى و فن جميل .. علوا رايتنا جيل ورا جيل
شفت لباز .. و شفت زويل
قالوا حيشقوا الصحرى بنيل
قالوا حيقصروا وقت الليل
و يخللنا نهارنا طويل
شفت زراعة و شفت صناعة
و عقول بدرها بكل براعة
شفت رياضة و شفت الكورة
خلوا بلادنا فى اجمل صورة
هو ده املى .. اللى عشانة انسال دمى
اوعة يا مصرى ترخص ثمنى
هو ده طارى و مفيش غيرة يبرد نارى
هو ده طارى و طار كل شهيد
سايبين بكرة فى ايدكم امانة بعهد جديد
عايزين مصر الغالية بلبس العيد
هو ده بس اللى حيرضينى
حتى فى موتى حبقى سعيد