انا و الخروف

كتبها بالاسلوب العامي : خالد مختار
اخيرا روحت بعد يوم طحن في الشغل وانا بحلم بالاكل والسرير
واخيرا امي حطتلي الاكل بعد انتهاء فرجتها علي المسلسل التركي حلقة رقم 532
اكلت ودخلت انام وحطيت دماغي علي المخده وسط سكوت رهيب وبدات ادخل في النوم وفجأه سمعت صوت مش مألوف
بيقول .. ماااااااااء ماااااااااااااااااااااااااء ماااااااااااااااااااااااااااااااااء
قمت زي المجنون وقلت لامي : في صوت عفريت عطشان فوق السطح بيقول ماااء
ضحكت وقالت : دا الخروف يا مدهول
قلت : اوعي تقولي ابويا جاب خروف
اخر مره اشتركنا احنا و 7 اشخاص علي خروف واحد كان نصبنا الجردل اللي كان بشرب منه الخروف
فردت عليا : لا يا واد كفاية علينا خروف وااااحد ( وهي بتشاور عليا ) دا خروف العيد بتاع عمك توفيق
ودخلت احاول انااااام والخروف مشغل سيموفينة نهر النيل مااااااااااااااء مااااااااااااااااء مااااااااااء
يدوب نعست ولاقيت امي بتصحيني وتقولي يلا يا واد ميعاد الشغل
فرديت ماااااااااااء فرشت عليا ازازة الميه وهي بتقول : خد المااااء وقوم يلا
وانا راجع بليل بعد معركة حربية طول اليوم في الشغل
لان شعار القطاع الخاص "" شغل كتير فلوس قليل احمد ربك طول الليل " ودخلت بشنطه
فأمي سالتني ايه في الشنطه دي
قلتلها دا جرجير رشوه للخروف عشان يسكت اصلي ملئتش برسيم ..
قالتلي: طيب يا فالح هات بقى حزمة عشان احطها للخروف التاني جنب الاكل ( اوعوا تفتكروا قصدها عليا انا )
وطلعت فوق السطح وحطيت للخروف الجرجير ومليت جردل الميه وطحنت عليه اقراص منومه عشان ياكل ويشرب وينام واعرف انام اناااااا
بعد ما اكل وشرب واطمنت ان كله تمام نزلت بئا وانا بضحك (ضحكة شيطانية )
مع مرور الوقت وانا بحلم بالشقرة اللي ماسكه سلاح (من وحي فيلم كارتون اطلنتس ) سمعت صوت الخروف بيقول
ماااااااااااااااااء موووووووووووووووووووووووء مءمءمءمءمءمءمءمءمممممممممممء ... ناعوووووووووووووووو
اظهار بدل ما احطله قرص منوم حطتله قرص حشيش
وفي اليوم التالي
دخلت البيت ولاقيت منظر رعب (مع موسيقيه مخيفه )
علي التربيزة الكبيرة صف سكاكين وساطور ومطواه قرن غزال وجنبيهم أكياس بلاستك .. وامي ربطه راسها الربطه اياها
وبتسن في السكينة الكبيرة
جريت علي اوضة ابويا وانا بقول : ابويااااااااااااااااا
ودخلت لاقيته لابس الملابس الرسمية الشورت والفانلة الدمور وبيقولي مالك يا هبل يا ابن الاهبل بتزعق ليه
فرديت : لا مفيش يا عم الحج
ولاقيته ماسك الراديو القديم وبيصلح فيه قلتله بتصلح ايه يا عم الحاج
فرد : اسكت ياض يمكن يجيب روتانا زمان
المهم سبته وطلعت وقلت لامي ايه الحرب البيضه اللي هتعملليها دي
فردت : ابوك جبلي كيلو لحمة عشان العيد
قلتها يلهوي كل الاسلحة والاكياس دي عشان كيلو لحمة علي كدا لو اسرائيل دخلت هتعملي فيهم ايه
فردت : اسكت يا واد خليني اعيش الاحساس واللحظة
والمهم دخلت انام ... بس حاسس ان في حاجه ناقصة اتقلب يمين وشمال مش عارف انام
اه فين صوت الخروف
قمت وسالت امي هو الخروف ساكت ليه
قالتلي: اصل ام ايمن اشترت النهارده خروفه
قلتلها : خروفه يعني ايه
قالتلي يعني مرات الخروف يا جاهل
قالتها : يعني الاتنين مع بعض فوق والشيطان تلاتهم طبعاااااااااا اااااه فهمت
قلت في عقلي بالي وبكل حقد دفين حتي الخروف سبقني في الجواز
تاني يوم سمعت خناقة وهات وماااااء ومااااااء ومااااااااء ...... مااااااااااااااء ماااااااااااااااااء ياعمر
قلت : هو انتوا كمان بتتخانقوا من تاني يوم وتسمعو امة لا اله الا الله
واخيره جيه يوم الميعاد
وطلعت مع الجزار وكلي غل ونفسي اشوف الخروف اللي تعبني لمده شهر وهو بيدبح
وحصلت المفاجأه مش لاقين الخروف .. فين الخروف فين الخروف
الخروف هرب مع الخروفه
الخروفه هربت مع الخروف
الاتين هروبه مع بعض
لو عرفت الحل اتصل 099999 او 099999 او 099999 برضه
الحل بالمقلوب
الخروف طلع كان مأجر السطح ايجار جديد من عم توفيق لغاية ما مذبحة العيد تخلص