هل أصبحنا دولة ساكسونيا ( حوار متخيل )

بقلم إيمان حجازي
ولبسها عامل المزلقان
قالو ماهو كان نايم فى عز الشغل , موش هندافع عنه ولا هنقول كان تعبان لأن الإهمال مالوش سبب ولا ممكن يكون له مبرر
ولكن عايزين ندقق شوية فى الصورة , نشوف ونقول هو ليه كان نايم فى عز الشغل ؟؟ ياترى بيشتغل فترة شغل تانية فى مكان تانى ؟؟
هنلاقى اللى يرد ويقول أبدا ده تلاقيه حشاش بيسهر طول الليل يحشش مع رفاقه فى الغرزة أو القهوة أو حتى فى التعريشة على الترعة !!!
ونقول معقول , الراجل ده هيجيب حق الحشيش منين !!!
يقولو دول ناس نماردة يقطعو من أوتهم عشان كيفهم ومزاجهم إنتى ما تعرفيهومش
طيب حتى لو كان ما هو أنا أعرف إن الإنسان اللى بيدخن أو بيحشش بيقول عشان ينسى همومه ,, يعنى إنسان ضعيف موش قادر يواجه حياته !!!
ممكن لو لقى اللى يكفيه ويغنيه ويشيل عنه الهموم ماكانش يحشش ولا يسهر طول الليل عند التعريشة
يا ستى , إنتى بالك طويل على فكرة وغاوية توجعى دماغك !!!!!
أبدا ,,,,,, ماهو لو شفتو إنهم إزاى سابو الوزير ولم يوجهو له أى تهمة!!!!
والوزير ماله يا سيتى ؟؟
الوزير مسئوليته سياسية !!!!
أبدا الوزير مسئوليته إدارية ..... صحيح هو موش مطالب بمعرفة كل إنسان يعمل فى الوزارة خاصة إن وزارة النقل متشعبة الأركان والمجالات ولكن ماهو مطالب به وضع هيكل ادارى وأجورى لكل العاملين يتم فيه تحديد الأجر المناسب لكل وظيفة زى ما بيتم تحديد المفردات الدقيقة للعمل ومتطلباته - يعنى توصيف وظيفى وهيكل أجور - لو الوزير لم يفعل ذلك تقع عليه المسئولية كاملة
وواضح أن وزيرنا الهمام لم يفعل , لأنه كان يعانى من ذات نفس المشكلة فى اليوم السابق له مع مرفق مترو الأنفاق والتى تسبب بسوء إدارته الى توقف المترو صباحا بالشكل الذى أصاب الشارع المصرى بشلل وربكة وجعل من المصريين طرفان متطاحنان متعاركان
ولأن هذا الوزير - فاشل إداريا - وكان يحق عليه فعلا التقدم بإستقالته قبل أن تطلب منه أو أن تفرض عليه , فنحن نضيف الى فشله الزريع إداريا المسئولية السياسية والتى يترتب عليها بكل تأكيد مسئولية جنائية ترتبط بموت أكثر من 40 طفل , هذا غير من ماتو فى حادث الميكروباس على الطريق السريع - انا موش قانونية ولكن أعتقد ذلك بالعقل يعنى -
وقد لحق كل هذه الكوارث - لهذا الوزير المحظوظ - خروج قطار الصوامع عن القضبان - وضاع القمح ضاع - صباح الوم التالى فى إمبابة
كل دى كوارث ومصايب تحدث فى فترة وزارة هذا الوزير ............ نعم نعم قد يتبارى أحدهم ويقول دى مشاكل وتراكمات عهد سبق عهد موصوم بالفساد ................. أكيد طبعا موش هنختلف ولكن
ولكن موش إحنا عملنا ثورة
وجبنا رئيس منتخب
وجبنا حكومة ثورية منتخبة
كان المفروض هذه الحكومة تثور وتفور الفساد والبوظان التابع له والنابع منه والقابع فيه
ولكن وجدنا أن هذه الحكومة تسير وفق خطوط طول وعرض سابقتها الفاسدة
والمطلوب منا أن نكتم النفس
هل هذا معقول ..................... أعتقد لأ
فعودا على بدء ................... يكون عامل المزلقان ليس وحده هو المسئول ولا يصح أن يشيل الليلة ويحاسب على المشاريب لوحده وإنما على الكل أن يتحمل جزءه من المسئولية وأن يعترف بجزءه من الجرم وأن يستعد لمقابلة الحق والعدل فى الجزاء وإلا أصبحنا بجد دولة ساكسونيا
ألا هل بلغت اللهم فإشهد