أفيز لكل مفلتاتى

بقلم : صالح شيحة
صدق أو لا تصدق.. فى مصر أكتر من 600 ألف واحد بيفلتوا فى ظل الإنفلات الأمنى والأخلاقى الموجود حالياً فى مصر وبيبورا الأراضى الزراعية وبيبنوا عليها ...بس الحكومة نجحت بنسبة 11% فى كتم 54 ألف حالة من اللى بيفلتوا دول وأمرت أجهزة الدولة بتركيب أفيز لكل مفلتاتى وإجباره لو عايز تفلت فلت وأنت لوحدك مش لازم الناس اللى حواليك تشم تفليتك وبشرى لطلاب المدارس حلمت إمبارح حلم وكنت متغطى ومكنش فيا حاجة عريانة إن وزير التعليم طلع على قناة إلبسى متنزليش عريانة وصرح أنه يجب الإقتداء بالحكومة وكما نجحت الحكومة بنسبة 11% بردة هتكون درجة النجاح 11% ..
وشوف الحكومة الذكية بتاعتنا قالت تتعامل مع المواطن بمبدأ هنقطع المياه والنوروإبنى يا مواطن القصور لكن المواطن تعامل مع الحكومة بأكثر ذكاءاً ورد المواطن وقال لو كان على المياه هندق ترومبة جنب البيت ولو على الكهرباء أنا مستعد أجيب مكينة كهرباء ولو معملتش حتى الكلام ده أنا بشكر الحكومة اللى خلتنى من كتر ما ورتنى أقدر أستحمل أى حاجة ..وبالمرة أنظف بطنى شوية من المياه الحلوة اللى خلت بطنى بكابورت ..
وزى ما بتقول سميرة سعيد يوم ورا يوم الأسبوع بيخلص وأنا بيزيد إعجابى بالحكومة بتاعتنا والموضوع بيتطور لحب ..فقد إتهمت مصادر رفيعة مش تخينة بوزارة الزراعة والإستصلاح الزراعى كمال الجنزورى أنه هو السبب فى اللى حصل عشان قراره بوقف أى موافقات لإنشاء مبانى خدمية أو مشروعات النفع العام وده خلى الناس تبنى بشكل عشوائى ..ودى حاجة طبعاً المواطن الغلبان ميفهماش زى الناس الرفيعة دى ..يعنى أنت يا مواطن كنت تعرف إن اللى بيبنى كان بيبنى وهو نيته البيت اللى يبنيه يسيبه سبيل لأطفال الشوارع ..تقدر تجيبلى واحد كان بيبنى عشان خاطر روحه ..
وبكرر إعجابى بالناس اللى عملت التقرير اللى إتعرض على وزير الزراعة اللى إكتشفوا لغز إنتشار ظاهرة التعدى على الأراضى الزراعية واللغز هو الإنفلات الأمنى وده طبعاً كانت حاجة غايبة عن الوزير..