صباح الخير يا عم الحاج .....قصيده بقلم هشام ابراهيم

صباح الخير يا عم الحاج
طيرك ليه من شجرك هج
وفين الصحبه والشله
ومية زيركو والقله
ونومة الضهر ف الضله
وقعدتكم..
وضحكتكم..
اللي خلت القلوب..
قبل الجتت تترج...!!
صباح الخير يا عم الحاج
ماااااااال الناس...؟؟؟!!!
محدش بيسلم علي حد
ومحدش بيعزم علي حد
ومحدش بيتونس بحد
ومحدش بيتكلم مع حد
؟؟؟؟!!!!
وفين الزرع والزرعه؟؟؟!!
وارضك ليه بقت صفرا
ونيلك فيه كلاب وحمير
وحتي الجو فيه عفره
راااااحت فين
؟؟؟!!
سلامو عليكو)
اهلا بيك
اتفضل اقعد
واشرب شاي
البت بيتك
الغيط غيطك
لو مشالتكش الارض
نشيلك ف عنينا
انت شرفتنا
احنا زارنا النبي
( انت نورتنا
. . . . . .
الكل ليه ملهي ف همه
والناس معادتشي هي الناس
الحب مالوش حضن يضمه
والحزن سيطر ع الاحساس
؟؟!!
خلااااااص يبني....
متقلبش المواجع
ده انت لسه راجع
من سفرك البعيد
حاجات كتير راحت
ومالح طعم الجديد
راحوا الطيبين
ماتو من سنين
مش فاضل ع المرابط
الا ظراط البقر
دبلو جذوع الشجر
سامع ..؟ حتي ناي الحنين
مبقاش غير ناي حزين
اسكت خليني ساكت
واشرب شايك وقوم
الصحبه الحلوه راحت
ومصاحبانا الهموم
بدعي ربك ياخدني
عريان من غير هدوم
واروح لناس حبايبي
واحشيني كل يوم
فاتوني لوحدي قاعد
بتحوم حواليا البوم
. . . . .
روّق يا عم الحاج
مسير ربك يعدّلها
مسير المايله يعدلها
وترجع تاني ضحكتنا
وصحبتنا
ولمتنا
ولو متنا..
هيفتكرونا ناس بالخير
ويدعولنا ف تربتنا
امين يبني..
اشوفك جد وبتبني
وتشيلني ف شيبتي وف عجزي
تكون اكتر حتي من ابني
امين يبني..
يقدرنا نشوف الضحكه من تاني
وانام مره مفيش علقم علي لساني
مفيش نغزه ف احضاني
واشوف علم البلد دي ف يوم
مرفرف وسط بستاني
مرفرف
وسط
بستاني
امين يا رب