مصر خرجت م السجون....محمد مصطفى الهلالي

فاكرنا لسه نتكي علي مسندك!؟
أيدنا عرفت الخلاص
وخلاص عرفنا مقصدك
ورسمنا بالدم الطريق
من عنادنا في مجلسك
مصر اللي خرجت
من سجون صاحبك عفية
مستحيل
هتطاطي تاني لحضرتك
مصر الشوارع والبيوت
مصر المزارع
والمصانع والمكن
دايره بترحي في الرحاية
لجل تفرم في الخيانة
والعمالة والمهانة
والصبر علي مر المحن
بايته تحلم بالهنا
إن شقشق الصبح
ف دروبها
يدن أدان الثورة
ينده ولادها الطيبين
يتقابلوا تاني ف الميدان
من نده واحده اتجمعوا
كلهم قوه وجلد
بنات بتحلم بالحياة
الحرة السعيدة
ستات بيوت طالعه
في أيدها كيس خضار
شبان وشيبه رجعوا
تاني للمدار
كل طوبه او حجر
تسمع النده تلبي للادان
الله واكبر ع الفلاح
الله اكبر ع العمل
غرك هدوء نيلها. يجوز!
غرك صمتنا جوه السكن!
وطمعت فينا!
ترتاح وتملك مصر بالقهر
وتغتصب ثوره
جمًعت كل الوطن
راية ونشيد.
حلم. وبعيييد عن سحنتك
غرك هدوء الصبح
ودهب الشمس
علي النيل العجوز
ولا تعرف إن اللي ارتوي
من شواطي الحلم
يحلم بالغريق
ويحلم بالدفا
بالنهاية المفرحة
وأنت غافل
والصبر طال منا شهور
من يناير ننتظر
و الهدر داير في البيوت
وأنت داير تقتله
لوشفت سن ولادنا
كيف طحن الألم
هتعتبر وتنتظم
في خط سيرك
كل تحرير وأنت طيب
كل هبْه وأنت غافل
فاكر الأحزان تخوفنا!
نرجع نتكي علي مسندك
إحنا خلاص
عرفنا مشوار الخلاص
مفيش يرجعنا
عن النوروالكرامه
إلا العدالة في مطلبي
وف مقصدك.....