بحبك فوق الوصف

بحبك فوق الوصف يا مصر ..
وبحب اللمه وصوت الزحمه ..
وكل شبر فيكى يا مصر..
وبحب الناس على نيلك قاعدين بلا حصر ..
وكوباية شاى مظبوطه تمام ..
نقعد نشربها ساعة العصر ..
وبحب ساعات أتأمل فيكى ..
وأقول ربنا يهدينا ليكى ..
وباحاول أيوه ..
باحاول مش هازهق .. ولا حاقول حرّمت ..
ده أنا كلى منك بيكى وليكى ..
ولاعمرى حابطل حٌب فيكى ..
ده انا لما باسافر بابقى حاموت وحشانى وارجع جرى عليكى ..
تعبان انا فيكى ..
يمكن أه .. لكن أبعد عنك لا بالعكس ..
سكنانى وحبك مالى كيانى ..
مليانى ولافيش حته فى قلبى لغيرك ..
ولاحد عاش قدّى ف خيرك ..
بس عيالك كانوا سارقينك ..
وأهو جه الوقت نرجّع نورك ..
وبحبك
فوق الوصف يا مصر ..
و بحب أدانك وقت العصر ..
وبحب اللمه وصوت الزحمه ..
وكل شبر فيكى يا مصر ..
وبحب شباب جدعان فرسان ..
نحتوا ملامحك تانى فى الصخر ..
رسموا الصوره ولونها سمارك ..
بنوا بشجاعة الحلم ديارك ..
ولسه يا مصر..
حلمنا واسع مالهوش آخر ..
لسه الحلم فى قلب البحر ..
ولسه باعافر .. وحافضل احاول ..
لسه يا مصر بحبك صوره وأصل ..
انا راح أترجم حبى قصايد ..
لأ مش بس قصايد نثر ..
ده انا راح اقولك كل كلامى أسم وفعل ..
أسم سكن جوايا سنين..
وأهو جِه الوقت ..
أنى أترجم حبى بجد ..
عارفه يا غاليه ..؟
ياللى نخيلك مالى عينيا ..
ياللى نيلك جوّه فى قلبى ..
ونسيم ليلك دايب فيا ..
عارفه حاقولك ..
أنا اهوه جايلك .. شايل حلمى بأيدى وواعى ..
انا اهوه صاحى ..
حايقولوا فاضى ..
مايقولوا هو انا يعنى يهمنى غيرك ..!
مهما حاولوا يبدلوا فيكى ..
أو مصالحهم تأذى عينيكى ..
مافيش غيرى اللى حايحميكى ..
أصل أنا فاهم ومانيش جاهل ..
وعينى عليكى .. انتى وبس ..
أنتى يا مصر ..
وبحبك ..
فوق الوصف يا مصر ..
وبحب ادانك وقت العصر ..
وبحب اللمه وصوت الزحمه ..
والناس على نيلك قاعدين بلا حصر ..
وبحبك ..
فوق الوصف ..
يا مصر ..