الفلاح الفصيح

اصبروا وصابروا

عقد مجلس برلمان المصطبة جلسته الأسبوعية الطارئة في وزارة الحاج عرفة أبو زيد بقرية روينة مقر الفلاح الفصيح بمحافظة كفر الشيخ لمتابعة وقائع المؤتمر التاريخي العالمي بشرم الشيخ للنهوض باقتصاد مصر والتف أعضاء المجلس حول التليفزيون لمتابعة كلمة بن مصر البار عبد الفتاح السيسي وعقب الاجتماع دار نقاش من القلب حول كلمة الرئيس.
العضو الفلفوس: والله الراجل حط النقط على الحروف وقال هذا حالنا ونمد يدنا لمن يحب مصر فكان أول من مد يده أخوة عرب يعرفون مكانة مصر وقدرها فليس هناك تعليق أكثر من أنهم سند لها في الملمات، كما أنها سند لهم في كل وقت وزمان.
العضو معيط: مصر أم الدنيا وربنا قال عنها كلام كبير واللي معاه ربنا فهو في حمايته ليوم القيامة.
العضو بهلول: أنا عاوز أقول حاجة مهمة خالص غايبة عننا وهي أننا كشعب دايما بنتعجل النتائج في أي حاجة بتعملها الدولة وده غير سليم فلازم ولابد من إعطاء الدولة الوقت الكافي وبعدين نحاسبها.
العضو زعيط: والله كلام أخونا بهلول في محله وده من عيوبنا كمصريين والسبب هو نسبة غير المتعلمين كبيرة ومن هنا ورايح لازم نتعلم الصبر.
العضو النمرود: كلامكم يا جماعة في السليم لكن لازم ولابد يكون فيه متابعة في عملية التنفيذ وكفاية علينا سنوات طويلة من الكلام الحلو وفعل مفيش.
العضو نطاط الحيط: كلام العضو زعيط والتعليق عليه من أخويا النمرود في محلهم فلازم ولابد من الصبر على السلطة ونعطيها الوقت الكافي لكن في نفس الوقت نتابعه لحظة بلحظة.
العضو العجوز: عاوز أختم جلستنا بكلمتين لأولادنا الشباب إن اللي بيحصل في مصر هو لكم أنتم فقد مضى علينا الدهر فتابعوا وأيدوا القائمين على المشاريع فإن أصابوا فاشكروهم وإن لم يصيبوا فعارضوهم ولكن كونوا معهم يدا واحدة ولا تخذلوهم.
الرئيس: ترفع الجلسة ولنذهب لتناول العزومة عند المهندس الزراعي سيد الغنام بمناسبة بناء منزله الجديد.