الدليل الذكى لحياة جاسوسية ناااااااجحة

تمكنت أجهزة مخابرات دولة "كفتاريكا" من القبض على جاسوس خطير يعمل لصالح دولة "أنتيكا" المعادية، وقد اعترف الجاسوس الذي يدعى "هريدي بن عمودين" اعترافاَ تفصيلياً بعد أن رصدت أجهزة مخابرات "كفتاريكا" تحركاته، وتمكنت من تصويره أثناء لعبه البلي فى حارة "أم سيد" الشهيرة لإقناع أطفال حضانة "الكتكوت الشرس" للانضمام لشبكة الجاسوسية التى كونها خلال ساعة ونص الساعة، ووعدهم بمغريات عديدة مثل الحصول يومياً على 3 وجبات كشرى "الغفير" بالحاجة الساقعة أو العصير، والحصول على سنارة هدية مع كل عضو جديد ينضم للشبكة.....
والآن أعزائي القراء من الشعب الكفتاريكي الحبيب، نقدم لكم الدليل الذكي للنجاح فى عالم الجاسوسية عشان ما تقعش زى صاحبنا لما تروح تتجسس فى دولة أنتيكا :
• اوعى تحط صورة بروفايلك على الفيس بوك أى صورة لك فى أى ميدان وسط المتظاهرين، خاصة لو كنت ماسك لوحة تحمل عبارات باللغة الانجليزية أو لو كنت لابس نظارة شمسية.
• امسح كل صورك المهمة من على اللاب توب بتاعك خصوصاً اللى قاعد فيها مع مجموعات وبتخطب فيهم. واوعى تنسي تمسح صورك بالزى العسكري أيام ما كنت عنصر جهنمى فى الجيش "الأنتيكي"...وطبعا تتخلص من كل السي ديهات وما تنساش الميمورى (مش عارفة ميمورى ايه ...بس هم كانوا كاتبنها كدا فى جورنال الأوهام، هنكدب الأوهام يعني؟!).
• اوعى تشيل صورك الجاسوسية الشخصية على الفلاش ميمورى وتمشي بيها...
• اوعى تحتفظ بأى جواز سفر لك يدل على جنسيتك الحقيقية "الانتيكية".
• أرجوك بلاش تشيل فى محفظتك كارت مكتوب عليه بخط أحمر أنيق : "جاسوس"...أنت مش سيد أبو حفيظة....! انت جاسوس محترم....!
• ممنوع منعاً باتاً اللف والدوران فى أماكن المظاهرات المختلفة...مش مرة فى ميدان "الغفير"....ومرة قدام التليفزيون...ومرة فى زول...دا ايه الهبل دا...ركز يا "جاسوس"...
• تخلص أول بأول من كل الايميلات ... وأجهزة الاتصال اللى بتبعت من خلالها أدق الأسرار الكونية للمخابرات المعادية "الانتيكية"....خاصة....جهاز "البلاك بنانا"....
مع تحياتي بحياة جاسوسية هانئة
إعلان
تعلن أكاديمية "التدريب على الجاسوسية المحترمة" عن فتح باب قبول دفعة جديدة من المتدربين على أعمال الجاسوسية بجميع أشكالها...بداية من استخدام البومب السري وحتى كيفية تجنيد أطفال الحضانات المختلفة من جميع الأعمار.....
نقدم لك نخبة ممتازة من مدربي أعمال الجاسوسية العالميين ( كيداهم مائير- جلعاد عبد الباسط- سعيد صالح- مديحة كامل "هنحضر لك روحها بطريقتنا يا عم ما تقلقش...بنقولك أكاديمية جاسوسية"
خدماتنا ممتازة...وأسعارنا لا تقارن....
شعارنا: ليه تتجسس أقل....لما ممكن تتجسس أكتر
لمزيد من المعلومات :
academy@ Gasosyia-academy.com